پاکستان تحریک انصاف کے 27 ستمبر کے احتجاج سے قبل بانی پی ٹی آئی عمران خان کی ہمشیرہ علیمہ خان نے بھی گرفتاری دے دی ہے۔ ذرائع کے مطابق علیمہ خان کو لاہور میں اپر مال پر واقع ان کی رہائش گاہ سے حراست میں لیا گیا ہے۔
میڈیا رپورٹس کے مطابق ان کی یہ گرفتاری پولیس کی درخواست پر ڈپٹی کمشنر کی جانب سے تھری ایم پی او (3 MPO) کا حکم نامہ جاری ہونے کے بعد عمل میں لائی گئی ہے۔ پولیس نے اپنی درخواست میں مؤقف اختیار کیا تھا کہ امن عامہ کے خطرے کے پیش نظر علیمہ خان کو حراست میں لینا ضروری ہے۔ ذرائع کا کہنا ہے کہ گرفتاری کے بعد ان کی گاڑی لٹن روڈ تھانے میں کھڑی کی گئی ہے، جبکہ انہیں کوٹ لکھپت جیل منتقل کر دیا گیا ہے۔
سہیل آفریدی کا معاملہ اور پی ٹی آئی کا احتجاج:
واضح رہے کہ اس سے قبل وزیراعلیٰ خیبر پختونخوا سہیل آفریدی کی جانب سے بھی لاہور میں پولیس کارروائی کو مبینہ طور پر ‘اغوا’ قرار دیا گیا تھا، جبکہ دوسری طرف پنجاب حکومت اور پولیس نے اس الزام کو سختی سے مسترد کرتے ہوئے مؤقف اپنایا تھا کہ انہیں صرف سکیورٹی وجوہات کی بنا پر پولیس گاڑی میں منتقل کیا گیا تھا۔
یہ بھی پڑھیں:اڈیالہ جیل میں بانی پی ٹی آئی عمران خان کا طبی معائنہ، پمز کی خصوصی ٹیم نے چیک اپ کیا
یاد رہے کہ پاکستان تحریک انصاف نے 27 ستمبر کو اسلام آباد مارچ کا اعلان کر رکھا ہے۔ پی ٹی آئی کا کہنا ہے کہ یہ احتجاج ان کی پرامن سیاسی جدوجہد کا حصہ ہے، تاہم حکومت کی جانب سے اس مارچ کے دوران امن و امان کی صورتحال خراب ہونے اور ممکنہ تصادم کے خدشات کا اظہار کیا جا رہا ہے۔ اس سے قبل رانا ثناء اللہ بھی یہ مطالبہ کر چکے ہیں کہ پی ٹی آئی اس بات کی ضمانت دے کہ احتجاج میں کوئی بھی مسلح شخص شریک نہیں ہوگا اور نہ ہی ریڈ زون یا سرکاری املاک کو نقصان پہنچایا جائے گا۔




