عمان نے 60 سال سے زائد عمر کے غیر ملکی کارکنوں کے لیے ورک پرمٹ کے اجراء اور تجدید کا عمل روک دیا ہے، جس کے باعث طویل عرصے سے ملک میں کام کرنے والے متعدد تارکین وطن متاثر ہونے کا خدشہ پیدا ہوگیا ہے۔
60 سال سے زائد عمر کے کارکنوں کے پرمٹ رک گئے
متعدد تارکین وطن کے مطابق حالیہ ہفتوں کے دوران ان کے آجروں کی جانب سے ورک پرمٹ کی تجدید کیلئے جمع کرائی گئی درخواستیں مسترد کردی گئی ہیں۔
معاملے سے واقف ایک سینئر اہلکار نے بھی تصدیق کی ہے کہ فی الحال 60 سال سے زائد عمر کے غیر ملکی کارکنوں کو ورک پرمٹ جاری نہیں کیے جارہے۔
چار سال پرانی پالیسی میں تبدیلی
یہ پیش رفت اس پالیسی میں تبدیلی کے طور پر سامنے آئی ہے جو چار سال سے زائد عرصہ قبل متعارف کرائی گئی تھی۔ اس پالیسی کے تحت 60 سال کی عمر سے تجاوز کرنے والے تجربہ کار غیر ملکی ملازمین کو مخصوص حالات میں نجی شعبے میں کام جاری رکھنے اور ورک پرمٹ کی تجدید کی اجازت دی گئی تھی۔
تجربہ کار تارکین وطن متاثر ہونے کا خدشہ
نئی صورتحال سے ان غیر ملکی کارکنوں کے متاثر ہونے کا امکان ہے جو 60 سال کی عمر مکمل کرنے کے باوجود کئی برسوں سے عمان میں اپنی ملازمتیں جاری رکھے ہوئے تھے۔
جنوری 2022 میں متعارف کرائے گئے قواعد کے تحت عمر کی سابقہ حد میں نرمی کی گئی تھی تاکہ نجی کمپنیاں تجربہ کار اور ہنرمند غیر ملکی ملازمین کو ملازمت پر برقرار رکھ سکیں۔
پرانے عمر کے قانون میں نرمی کیوں کی گئی تھی؟
اس وقت عمان کی وزارت محنت کی جانب سے بتایا گیا تھا کہ متعدد کمپنیاں تجربہ کار غیر ملکی ملازمین کو عمر کی مقررہ حد سے زیادہ برقرار رکھنے کے لیے بار بار خصوصی اجازت کی درخواستیں دے رہی تھیں۔
اسی ضرورت کے پیش نظر 60 سال کی عمر کے بعد ورک پرمٹ کی تجدید پر عائد سابقہ پابندی میں نرمی کی گئی تھی۔
وزارت محنت کی ویب سائٹ پر سروس تاحال موجود
عمان کی وزارت محنت کی ویب سائٹ پر غیر عمانی کارکنوں کے ورک پرمٹ کی تجدید سے متعلق سروس اب بھی درج ہے، تاہم موجودہ سروس پیج پر عوامی طور پر عمر کی کوئی واضح حد بیان نہیں کی گئی۔
موجودہ صورتحال میں 60 سال سے زائد عمر کے غیر ملکی کارکنوں کے لیے ورک پرمٹ کے اجرا یا تجدید کا عمل عملی طور پر متاثر ہوتا دکھائی دے رہا ہے۔
تارکین وطن میں تشویش
ورک پرمٹ کی تجدید رکنے سے 60 سال سے زائد عمر کے ان تارکین وطن میں تشویش پیدا ہوگئی ہے جو طویل عرصے سے عمان میں ملازمتیں کررہے ہیں اور اپنی آمدن کیلئے انہی ملازمتوں پر انحصار کرتے ہیں۔
مزید یہ بھی پڑھیں:ایپل کمپنی پاکستان میں دفتر کھولنے کو تیار، امریکی قونصل جنرل نے بڑی خبر سنا دی
نئی پالیسی کے مکمل اطلاق، اس کے دائرہ کار اور ممکنہ استثنیٰ سے متعلق مزید وضاحت عمانی حکام کی جانب سے سامنے آنا باقی ہے۔
