اسلام آباد (کشمیر ڈیجیٹل) پیپلز پارٹی آزاد کشمیر کے صدر چوہدری یاسین نے الزام عائد کیا ہے کہ آزاد کشمیر کے انتخابات میں مسلم لیگ (ن) کو زبردستی کامیاب کرایا جا رہا ہے جبکہ متنازع حلقوں میں شفاف تحقیقات کی ضرورت ہے۔
اسلام آباد میں نیشنل پریس کلب میں سابق وزیر صحت جاوید بڈھانوی اور ارشد صہیب کے ہمراہ پریس کانفرنس کرتے ہوئے چوہدری یاسین نے کہا کہ آزاد کشمیر میں انتخابات کا تیسرا مرحلہ کل ہوگا، تاہم پیپلز پارٹی نے پہلے دن سے ہی مرحلہ وار انتخابات کی مخالفت کی ہے۔
انہوں نے کہا کہ الیکشن کمیشن نے اپنی مرضی سے انتخابات کا انعقاد کیا ۔ ان کے بقول موجودہ الیکشن کمشنر کے بھی مخصوص مقاصد ہیں اور انتخابات کے عمل نے 2016ء کے انتخابات کی یاد تازہ کر دی ہے۔
چوہدری یاسین نے الزام عائد کیا کہ آزاد کشمیر کے حلقہ ایل اے 9 میں منظم دھاندلی کے بجائے ’’دھاندلا‘‘ کیا جا رہا ہے اور مسلم لیگ (ن) کو زبردستی کامیاب کرانے کی کوشش کی جا رہی ہے۔
مزید یہ بھی پڑھیں:آن لائن اسٹور پر 75 کروڑ روپے کے جعلی آرڈرز دے کر منسوخ کرنے والی جاپانی خاتون گرفتار
پیپلز پارٹی آزاد کشمیر کے صدر نے مزید کہا کہ رانا ثناء اللہ نے کئی ماہ قبل ہی مسلم لیگ (ن) کی کامیابی کا اعلان کر دیا تھا۔ ان کے مطابق ن لیگ نے دھاندلی کے تمام سابقہ ریکارڈ توڑ دیے ہیں۔
انہوں نے مطالبہ کیا کہ جن حلقوں میں انتخابات کے حوالے سے اعتراضات اور تحفظات سامنے آئے ہیں، وہاں شفاف تحقیقات کرائی جائیں۔
چوہدری یاسین کا کہنا تھا کہ ن لیگ کی کمیٹی نے 80 فیصد سے زائد پولنگ والے حلقوں کی تحقیقات پر آمادگی ظاہر کی تھی، تاہم بعد میں اپنے مؤقف سے پیچھے ہٹ گئی۔
چوہدری یاسین نے کہا کہ انتخابی عمل پر اٹھنے والے سوالات کا جواب شفاف تحقیقات کے ذریعے دیا جانا چاہیے تاکہ انتخابات کی ساکھ برقرار رہ سکے۔
مزید یہ بھی پڑھیں:آزاد جموں و کشمیر قانون ساز اسمبلی انتخابات: تیسرا مرحلہ کل، باغ اور حویلی میں کاٹنے کا مقابلہ متوقع
دوسری طرف جاوید بٖڈ ھانوی نے کہا کہ میرے حلقے میں دھاندلی اور چوہدری محمد یاسین کے حلقے میں دھاندلا ہوا۔
