شدید گرمی اور حبس سے پریشان شہریوں کے لیے ایک زبردست اور خوش آئند خبر سامنے آئی ہے۔ محکمہ موسمیات نے آئندہ دو روز کے دوران ملک کے مختلف علاقوں میں آندھی، تیز ہواؤں اور گرج چمک کے ساتھ بارشوں کی پیشگوئی کرتے ہوئے جھلسا دینے والے موسم میں واضح بہتری کی نوید سنا دی ہے۔
محکمہ موسمیات کی رپورٹ کے مطابق، اگرچہ ملک کے بیشتر علاقوں میں مجموعی طور پر موسم گرم اور خشک رہے گا اور میدانی علاقوں میں درجہ حرارت بھی معمول سے زیادہ رہنے کا امکان ہے، تاہم بالائی خیبر پختونخوا، کشمیر اور شمال مشرقی پنجاب کے مختلف مقامات پر بادل کھل کر برسیں گے۔
یہ بھی پڑھیں: کشمیرسمیت ملک کے بیشتر علاقوں میں آندھی اور گرج چمک کے ساتھ بارشوں کی پیشگوئی
کشمیر،خیبر پختونخوا اور گلگت بلتستان کا احوال
خیبر پختونخوا کے بیشتر اضلاع میں بھی موسم گرم اور خشک رہے گا، لیکن دیر، سوات، کوہستان، ایبٹ آباد، مانسہرہ اور پاراچنار سمیت بالائی علاقوں کے شہریوں کو آندھی اور گرج چمک کے ساتھ ہونے والی بارش سے گرمی سے ریلیف ملے گا۔ ادھر کشمیر میں موسم جزوی طور پر ابر آلود رہنے کے ساتھ ساتھ مختلف مقامات پر گرج چمک کے ساتھ بارش متوقع ہے، جبکہ گلگت بلتستان میں موسم زیادہ تر خشک اور جزوی طور پر ابر آلود رہے گا۔
پنجاب اور وفاقی دارالحکومت میں موسم کی صورتحال
صوبہ پنجاب کے بیشتر اضلاع میں گرمی کی شدت برقرار رہے گی، تاہم لاہور، قصور، فیصل آباد، ساہیوال، اوکاڑہ، پاکپتن اور وہاڑی سمیت مختلف علاقوں میں تیز آندھی اور بارش متوقع ہے۔ اس کے علاوہ مری، گلیات، جہلم، گوجرانوالہ، سیالکوٹ، نارووال، شیخوپورہ، سرگودھا، فیصل آباد اور خانیوال میں بھی گرج چمک کے ساتھ بارش ہونے کا واضح امکان ظاہر کیا گیا ہے۔ دوسری جانب وفاقی دارالحکومت اسلام آباد اور اس کے گردونواح میں موسم گرم رہے گا، تاہم دوپہر کے اوقات میں بادل چھانے اور بعض مقامات پر ہلکی بارش کی توقع ہے۔
مزید پڑھیں: اسلام آباد میں بارش سے موسم خوشگوار، این ڈی ایم کاہائی الرٹ جاری
سندھ اور بلوچستان میں شدید گرمی کی لہر
محکمہ موسمیات کے مطابق، سندھ اور بلوچستان کے بیشتر علاقوں کے باسیوں کو ابھی گرمی سے ریلیف نہیں ملے گا اور وہاں شدید گرمی کی لہر (ہیٹ ویو) برقرار رہنے کا امکان ہے۔ سندھ کے بالائی و وسطی اضلاع جبکہ بلوچستان کے وسطی علاقوں میں درجہ حرارت مزید بڑھ سکتا ہے، تاہم دونوں صوبوں کے ساحلی علاقوں میں گرد آلود ہوائیں چلنے کی توقع ظاہر کی گئی ہے۔
