وہ صف جس میں دل، قدم اور ارادے ایک ہوں اللہ اسے پسند کرتا ہے: شاہد آفریدی

لاہور: پاکستان کرکٹ ٹیم کے سابق کپتان شاہد آفریدی نے معرکہ حق کی پہلی سالگرہ پر افواجِ پاکستان اور قوم کی بہادری کو خراجِ تحسین پیش کیا ہے۔ اپنے ایک خصوصی پیغام میں انہوں نے اتحاد اور ایمان کی طاقت پر زور دیتے ہوئے کہا کہ وہ صف جس میں دل ایک ہوں، قدم ایک ہوں اور ارادے پکے ہوں اللہ تعالیٰ اسے پسند فرماتا ہے۔

شاہد آفریدی کا کہنا تھا کہ معرکہ حق کو ایک سال مکمل ہو چکا ہے لیکن اس عظیم جیت کی تڑپ اور خوشی آج بھی پاکستانی قوم کے دلوں میں اسی طرح زندہ ہے۔ انہوں نے واضح کیا کہ آپریشن بنیان المرصوص محض ایک فوجی کارروائی نہیں تھی، بلکہ یہ پاکستانی قوم کی غیرت، پاک فوج کی بے مثال بہادری اور اللہ تعالیٰ کی خصوصی مدد کی ایک عظیم نشانی تھی جس نے دشمن کے غرور کو خاک میں ملا دیا۔

یہ بھی پڑھیں: معرکہ حق “بنیانِ مرصوص” کی پہلی سالگرہ: آزاد کشمیر میں یومِ تجدیدِ وفا اور جشنِ فتح کی پروقار تقریبات

وہ صف جس میں دل ایک ہوں، قدم ایک ہوں، اور ارادے پکے ہوں اللہ اسے پسند کرتا ہے۔ آپریشن بنیان المرصوص کو ایک سال ہو گیا، لیکن یہ جیت آج بھی قوم کے دلوں میں زندہ ہے۔ یہ صرف ایک آپریشن نہیں تھا، یہ پاکستانی قوم کی غیرت، پاک فوج کی بہادری اور اللہ کی مدد کی نشانی تھی۔

دنیا کو آج نفرت… pic.twitter.com/oAW63htJFR

— Shahid Afridi (@SAfridiOfficial) May 10, 2026

سابق کپتان نے عالمی صورتحال پر گفتگو کرتے ہوئے کہا کہ دنیا کو آج نفرتوں کی نہیں بلکہ امن، برداشت اور انسانیت کی ضرورت ہے۔ انہوں نے اس بات پر زور دیا کہ پاکستان نے ہمیشہ امن کا پرچار کیا ہے اور عالمی سطح پر امن کی بات کی ہے، مگر جب بھی وطنِ عزیز کی حرمت اور وقار پر کوئی آنچ آئے تو پوری قوم تمام اختلافات بھلا کر ایک سیسہ پلائی دیوار بن جاتی ہے۔

مزید پڑھیں: معرکہ حق دو نظریات کے درمیان فیصلہ کن جنگ تھی، دشمن کا خواب کبھی پورا نہیں ہونے دیں گے: فیلڈ مارشل عاصم منیر

شاہد آفریدی نے اپنے پیغام کے آخر میں کہا کہ معرکہ حق نے پوری دنیا کو یہ واضح پیغام دے دیا ہے کہ اصل طاقت صرف جدید ہتھیاروں یا ٹیکنالوجی میں نہیں ہوتی، بلکہ اصل طاقت اتحاد، پختہ ایمان اور سچائی میں پوشیدہ ہوتی ہے۔ ان کا کہنا تھا کہ معرکہ حق کی کامیابی دراصل قوم اور فوج کے اسی بے مثال اتحاد کا ثمر ہے جس پر ہر پاکستانی کو فخر ہے۔