اسلام آباد( کشمیر ڈیجیٹل ) زکوٰۃ کی کٹوتی کیلئے 3 مارچ ( پیر کے روز) بینک بند رہیں گے، سٹیٹ بینک نے نوٹیفکیشن جاری کردیا ہے۔بینکوں کو بھیجےگئے مراسلے میں کہا گیا ہےکہ زکوٰۃ کی مد میں کٹوتی رمضان کی پہلی تاریخ کی مناسبت سے ہوگی۔
سٹیٹ بینک کے نوٹیفکیشن کے مطابق بینک ملازمین حاضر رہیں گے لیکن صارفین سے کسی قسم کا لین دین نہیں کیا جائیگا،زکوۃ کی کٹوتی پر ہر سال یکم رمضان کو کی جاتی ہے، یکم رمضان اتوار کے روز ہونے پر دو رمضان کو زکوٰۃ کی کٹوتی کی جائیگی۔
ادھروفاقی وزارت تخفیف غربت و سماجی تحفظ نے سال 2025 کیلئےزکوٰۃ کا نصاب جاری کر دیا ہے۔بینکوں کو جاری مراسلہ کے مطابق اگر اکاؤنٹ میں ایک لاکھ 79 ہزار 689 روپے یا اس سے زائد رقم ہوئی تو زکوٰۃ کٹوتی ہوگی۔
وزارت تخفیف غربت و سماجی تحفظ کے مطابق بچت اکاؤنٹ، نفع ونقصان اور اس طرح کے اکاؤنٹس پر زکوٰۃ لاگو ہوگی۔ کرنٹ اکاؤنٹس سے زکوٰۃ نہیں کاٹی جائے گی۔
زکوٰۃ و عشر آرڈیننس 1980 کے مطابق 1 لاکھ 79 ہزار689 روپے سے کم بیلنس کے اکاؤنٹس زکوٰۃ کٹوتی سے مستثنٰی ہوں گے اور ان سے زکوٰۃ منہا نہیں کی جائے گی۔
یہ بھی پڑھیں: آزاد کشمیر بھر کے مستحقین زکوٰۃ کو رقوم کی فراہمی کر دی گئی
