مظفرآباد (کشمیر ڈیجیٹل) مظفرآباد اور گرد و نواح میں ہلکی بارش کے بعد موسم نہایت خوشگوار ہو گیا ہے، جس سے شہریوں نے سکون اور ٹھنڈک کا احساس کیا۔
بارش کے باعث فضا میں نمی بڑھ گئی اور درجہ حرارت میں کمی دیکھنے میں آئی، جس نے موسم کو مزید دلکش بنا دیا ۔
شہریوں کی بڑی تعداد نے اس خوشگوار تبدیلی کو سراہا اور اسے گرمی یا خشکی کے بعد ایک خوش آئند تبدیلی قرار دیا۔
دوسری جانب اسٹیٹ ڈیزاسٹر مینجمنٹ اتھارٹی (ایس ڈی ایم اے) نے موسمی صورتحال کے پیش نظر الرٹ جاری کیا ہے ۔
ادارے کے مطابق آئندہ ایک سے دو روز کے دوران بالائی علاقوں میں برفباری کا امکان ہے، جس کے نتیجے میں درجہ حرارت مزید گر سکتا ہے اور سردی کی شدت میں اضافہ ہو سکتا ہے ۔
مزید یہ بھی پڑھیں:پاک فوج کے زیر اہتمام بٹل سیکٹر کے خوبصورت علاقے سلوئی منڈہول میں شاندار والی بال ٹورنامنٹ
اس صورت حال کے باعث معمولات زندگی متاثر ہونے کا بھی خدشہ ظاہر کیا گیا ہے۔
ایس ڈی ایم اے نے خبردار کیا ہے کہ مسلسل بارشوں کی وجہ سے پہاڑی علاقوں میں لینڈ سلائیڈنگ کا خطرہ بڑھ گیا ہے، جبکہ مختلف مقامات پر سڑکوں کی بندش بھی پیش آ سکتی ہے ۔
اس کے پیش نظر ریسکیو اداروں اور ضلعی انتظامیہ کو ہائی الرٹ رہنے کی ہدایات جاری کی گئی ہیں تاکہ کسی بھی ہنگامی صورتحال سے بروقت نمٹا جا سکے۔
مزید برآں شہریوں اور مسافروں کو غیر ضروری سفر سے گریز کرنے کا مشورہ دیا گیا ہے، خصوصاً پہاڑی راستوں پر سفر کے دوران احتیاط برتنے کی تاکید کی گئی ہے ۔
مزید یہ بھی پڑھیں:بارش ہو گی یا گرمی بڑھے گی؟محکمہ موسمیات نے پیشگوئی کر دی
کسانوں کو بھی ہدایت کی گئی ہے کہ وہ اپنی فصلوں اور باغات کے تحفظ کے لیے پیشگی اقدامات کریں تاکہ ممکنہ نقصانات سے بچا جا سکے ۔
