وفاقی دارالحکومت کے علاقے تھانہ ہمک کی حدود میں ایک نہایت افسوسناک واقعہ پیش آیا ہے جہاں معروف پشتو ٹک ٹاکر ثناء جاوید، جو سوشل میڈیا پر ‘آؤٹ لوفرہ’ کے نام سے مشہور تھیں، کو ان کے شوہر نے مبینہ طور پر فائرنگ کر کے قتل کر دیا اور بعد ازاں خود کو گولی مار کر اپنی زندگی کا بھی خاتمہ کر لیا۔
پولیس ذرائع کے مطابق یہ لرزہ خیز واقعہ تھانہ ہمک کے علاقے لگنم ٹاور کے قریب پیش آیا۔ ابتدائی اطلاعات کے مطابق مقتولہ کے شوہر، محمد صادق نے گھریلو ناچاقی کی بنیاد پر پہلے اپنی اہلیہ ثناء جاوید کو گولی ماری جس سے وہ موقع پر ہی جاں بحق ہو گئیں، اور پھر اسی پستول سے اپنے سر میں گولی مار کر خودکشی کر لی۔ واقعے کی اطلاع ملتے ہی پولیس اور ریسکیو ٹیمیں جائے وقوعہ پر پہنچ گئیں اور دونوں لاشوں کو ضروری کارروائی کے لیے قریبی اسپتال منتقل کر دیا۔
یہ بھی پڑھیں: امیر طبقے پر بوجھ، غریب کو ریلیف: وزیراعظم کا ہائی آکٹین پر لیوی میں اضافے کا بڑا فیصلہ
تحقیقاتی پیش رفت اور شواہد:
پولیس نے جائے وقوعہ سے شواہد اکٹھے کر لیے ہیں، جن میں نائن ایم ایم (9mm) پستول اور تین گولیوں کے خول برآمد ہوئے ہیں، جنہیں تحویل میں لے کر فارنزک کے لیے بھیج دیا گیا ہے۔ مقدمے کے متن کے مطابق، ملزم محمد صادق اٹک پولیس میں بطور کانسٹیبل تعینات تھا۔ ابتدائی تحقیقات سے معلوم ہوا ہے کہ دونوں میاں بیوی کے درمیان اکثر جھگڑے رہتے تھے اور یہ واقعہ بظاہر اسی گھریلو ناچاقی کا شاخسانہ معلوم ہوتا ہے۔
مقتولہ کا پس منظر:
ذرائع کا کہنا ہے کہ مقتولہ ثناء جاوید کی یہ دوسری شادی تھی۔ اس سے قبل ان کی شادی شفیق احمد نامی شخص سے ہوئی تھی، جس سے انہوں نے خلع لے لی تھی۔ پولیس نے واقعے کا مقدمہ درج کر کے مختلف پہلوؤں پر مزید تحقیقات کا آغاز کر دیا ہے تاکہ اصل محرکات تک پہنچا جا سکے۔
