اسلام آباد: محکمہ موسمیات کے مطابق کل ایران کے راستے ایک نیا موسمی سسٹم پاکستان میں داخل ہو رہا ہے، جس کے باعث نہ صرف بارشیں متوقع ہیں بلکہ ایران میں حالیہ بمباری کے نتیجے میں پیدا ہونے والے آلودہ ذرات بھی پاکستان تک پہنچ سکتے ہیں۔
بارشیں اور طوفانی ہوائیں:
محکمہ موسمیات کے جاری کردہ بیان کے مطابق اس نئے سسٹم کے زیرِ اثر شمال مشرقی بلوچستان میں گرج چمک کے ساتھ بارشوں کی توقع ہے اور یہ سلسلہ مسلسل تین روز تک جاری رہ سکتا ہے۔ اس دوران بارش کے ساتھ ساتھ تیز طوفانی ہوائیں چلنے کا بھی قوی امکان ظاہر کیا گیا ہے۔
یہ بھی پڑھیں: بارشوں، برفباری کا نیا سلسلہ کب تک جاری رہیگا،محکمہ موسمیات نے پیشگوئی کردی
فضائی معیار پر اثرات اور آلودہ ذرات:
یاد رہے کہ ایران میں تیل کی تنصیبات پر ہونے والی خوفناک بمباری کے بعد وہاں ‘سیاہ بارش’ کے واقعات سامنے آئے تھے، جس کے بعد پڑوسی ممالک میں بھی اس کے اثرات کے خدشات پیدا ہو گئے ہیں۔ ماہرینِ موسمیات کا کہنا ہے کہ مغرب سے آنے والی ان ہواؤں میں آلودہ ذرات موجود ہو سکتے ہیں جو پاکستان کے مغربی حصوں کے فضائی معیار کو بری طرح متاثر کر سکتے ہیں۔
کالی بارش کا امکان اور نمونوں کی جانچ:
اگرچہ محکمہ موسمیات نے فی الحال پاکستان میں ‘کالی بارش’ کے امکان کو مسترد کر دیا ہے، تاہم احتیاطی تدابیر کے طور پر تمام ریجنل آفسز کو خصوصی ہدایات جاری کر دی گئی ہیں۔ حکام نے ہدایت کی ہے کہ اس سسٹم کے تحت ہونے والی بارش کے نمونے فوری طور پر جمع کیے جائیں تاکہ ان میں موجود آلودگی اور کیمیائی اجزاء کی جانچ کی جا سکے۔
