بے نظیر انکم سپورٹ پروگرام (BISP) نے بے نظیر کفالت پروگرام کے تحت رجسٹرڈ اور اہل مستحقین کے لیے سہ ماہی قسط میں نمایاں اضافے کا اعلان کیا ہے۔
سرکاری اعلامیے کے مطابق، اب سہ ماہی وظیفہ 13,500 روپے سے بڑھا کر 14,500 روپے کر دیا گیا ہے۔ اس فیصلے سے ملک بھر میں پروگرام سے منسلک لاکھوں خواتین مستفید ہوں گی۔
حکام کا کہنا ہے کہ اس حالیہ اضافے کا مقصد معاشی چیلنجز کے دوران کم آمدنی والے گھرانوں پر مالی بوجھ کم کرنا اور مستحقین کو گھریلو اخراجات میں سہولت فراہم کرنا ہے۔ اضافی رقم کی ادائیگی BISP کے موجودہ ادائیگیوں کے نظام کے ذریعے ہی کی جائے گی تاکہ شفافیت کو یقینی بنایا جا سکے۔
یہ بھی پڑھیں: حکومت کا بینظیر انکم سپورٹ پروگرام میں نوکریوں کا اعلان
ادائیگیوں کی تصدیق اور بائیومیٹرک گائیڈ:
اگر آپ کی بے نظیر کفالت پروگرام کی قسط تاخیر کا شکار ہے یا اسٹیٹس میں “انڈر ویریفکیشن” (Under Verification) ظاہر ہو رہا ہے، تو آپ کو فوری طور پر ادائیگی کی تصدیق کا عمل مکمل کرنا ہوگا۔ بی آئی ایس پی حکام کے مطابق، رقم کا اجرا صرف شناختی کارڈ کی تصدیق، این ایس ای آر (NSER) ڈیٹا کی جانچ پڑتال اور مقررہ مراکز پر بائیومیٹرک تصدیق کے بعد ہی ممکن ہے۔
صارفین اپنی اہلیت اور رقم کی صورتحال جاننے کے لیے اپنا 13 ہندسوں کا قومی شناختی کارڈ نمبر ‘8171’ پر ایس ایم ایس کر سکتے ہیں یا آفیشل ویب پورٹل کے ذریعے گھر بیٹھے معلومات حاصل کر سکتے ہیں۔ اگر پورٹل پر “پیمنٹ ریلیز” (Payment Released) کا پیغام موصول ہو تو رقم وصول کی جا سکتی ہے، بصورتِ دیگر کسی بھی قسم کی تاخیر سے بچنے کے لیے فراہم کردہ ہدایات پر عمل کرنا ضروری ہے۔
