پاکستان میں سونے کی قیمتوں میں مسلسل اضافے کا سلسلہ برقرار ہے اور آج مقامی صرافہ بازاروں میں سونے کے نرخوں میں ایک بار پھر بڑا اضافہ ریکارڈ کیا گیا ہے۔ عالمی مارکیٹ میں قیمتیں بڑھنے کے اثرات مقامی سطح پر بھی واضح طور پر دیکھے جا رہے ہیں جس کے بعد سونا تاریخ کی نئی بلند ترین سطح کی جانب گامزن ہے۔
آل پاکستان صرافہ جیمز اینڈ جیولرز ایسوسی ایشن کی جانب سے جاری کردہ اعداد و شمار کے مطابق، ملک میں فی تولہ سونے کی قیمت میں 3 ہزار 400 روپے کا بڑا اضافہ ہوا ہے۔ اس اضافے کے بعد اب ایک تولہ سونا 5 لاکھ 39 ہزار 962 روپے کا ہو گیا ہے۔ سونے کی قیمتوں میں ہونے والے اس مسلسل اضافے نے خریداروں اور جیولرز دونوں کو تشویش میں مبتلا کر دیا ہے۔
یہ بھی پڑھیں: سونا اور چاندی خریدنے والوں کے لیے بری خبر: قیمتوں میں آج پھر بڑا اضافہ
صرف فی تولہ ہی نہیں بلکہ 10 گرام سونے کے نرخوں میں بھی نمایاں تیزی دیکھی گئی ہے۔ رپورٹ کے مطابق 10 گرام سونا 2 ہزار 915 روپے مہنگا ہونے کے بعد اب 4 لاکھ 62 ہزار 930 روپے کی سطح پر پہنچ گیا ہے۔ مقامی سطح پر قیمتوں میں اس تیزی کی بنیادی وجہ عالمی مارکیٹ میں ہونے والا اتار چڑھاؤ بتایا جا رہا ہے۔
دوسری جانب اگر عالمی بازار پر نظر ڈالی جائے تو وہاں بھی سونے کی قیمتوں میں استحکام کے بجائے تیزی کا رجحان پایا گیا۔ عالمی مارکیٹ میں سونے کی قیمت 34 ڈالرز کے اضافے کے بعد 5 ہزار 172 ڈالرز فی اونس ہو گئی ہے۔ بین الاقوامی سطح پر قیمتوں میں ہونے والے اس اضافے کے براہِ راست اثرات پاکستان کی مقامی مارکیٹ پر بھی مرتب ہو رہے ہیں۔
