کویت سٹی: کویتی حکام نے وزٹ ویزا قوانین میں اہم ترامیم کرتے ہوئے ویزے کی مدت میں اضافے اور مسافروں کے لیے نئے امیگریشن فریم ورک کے تحت متعدد سہولیات متعارف کرا دی ہیں۔ ان تبدیلیوں کا مقصد ویزا کے حصول کو جدید آن لائن نظام کے ذریعے آسان بنانا ہے۔
حالیہ وضاحت کے مطابق، قیام کی مدت اور دوبارہ داخلے سے متعلق کئی غلط فہمیاں دور کر دی گئی ہیں۔ اب یہ لازمی نہیں ہے کہ ہر تین ماہ بعد وزیٹر تین ماہ کے لیے ملک سے باہر رہے۔ موجودہ قوانین میں ایسی کوئی شرط نہیں کہ ویزا ختم ہونے پر ملک چھوڑنے کے بعد مزید تین ماہ باہر رہنا ضروری ہو۔ تاہم، ویزا کی مدت ختم ہونے کی صورت میں مسافر کو ملک سے روانہ ہونا پڑے گا، جس کے بعد وہ دوبارہ نیا ویزا حاصل کر کے واپس آ سکتا ہے۔
یہ بھی پڑھیں: کویت جانے کے خواہشمند غیرملکی ورکرز کیلئے لیبر نظام میں نئی تبدیلی متعارف
رپورٹ میں واضح کیا گیا ہے کہ مخصوص ایئر لائن کے ذریعے ملک میں داخلے جیسی پرانی پابندیاں ختم کر دی گئی ہیں۔ اس کے علاوہ، تین بار ملک چھوڑنے کے بعد دوبارہ ویزا جاری نہ کرنے کی کوئی باضابطہ پابندی نہیں ہے، البتہ ہر نئی درخواست کی انفرادی طور پر جانچ پڑتال کی جاتی ہے۔
نئے قواعد کے تحت، وزارت کی منظوری اور مقررہ فیس کی ادائیگی پر وزٹ ویزا کی مدت میں 3 ماہ سے 6 یا 12 ماہ تک توسیع کی جا سکتی ہے۔ حکام نے خبردار کیا ہے کہ مقررہ مدت سے زائد قیام کی صورت میں بھاری جرمانہ، ملک بدری (ڈی پورٹیشن) یا مستقبل میں داخلے پر مستقل پابندی عائد ہو سکتی ہے۔ مسافروں کے لیے پاسپورٹ کا درست ہونا اور کسی بھی قسم کی قانونی خلاف ورزی سے پاک ہونا لازمی قرار دیا گیا ہے۔
