بیجنگ: چین میں سوشل میڈیا کی دنیا سے ایک سبق آموز واقعہ سامنے آیا ہے جہاں ایک معروف خاتون انفلوئنسر کی لائیو اسٹریمنگ کے دوران بیوٹی فلٹر اچانک بند ہونے سے ان کا اصل چہرہ ناظرین کے سامنے آگیا، جس کے باعث انہیں شدید مالی اور ساکھ کے نقصان کا سامنا کرنا پڑا۔
میڈیا رپورٹ کے مطابق، مذکورہ انفلوئنسر ایک مقبول چینی سوشل میڈیا پلیٹ فارم پر براہِ راست نشریات کے دوران میک اپ ٹپس اور فیشن مشورے دے رہی تھیں۔ ان کی ویڈیوز میں استعمال ہونے والا بیوٹی فلٹر ان کے چہرے کو ہموار، جھریوں سے پاک اور جوان دکھاتا تھا، جس کی وجہ سے وہ لاکھوں مداحوں میں مقبول تھیں۔ تاہم، تکنیکی خرابی کے باعث فلٹر اچانک غیر فعال ہوگیا اور ان کی قدرتی جلد اور عمر کے اثرات نمایاں ہوگئے۔
یہ بھی پڑھیں: نادرا نے رمضان المبارک کے لیے نئے اوقاتِ کار کا اعلان کر دیا
اس واقعے کی ویڈیو وائرل ہوتے ہی سوشل میڈیا پر بحث چھڑ گئی۔ کچھ صارفین نے ان پر فالوورز کو گمراہ کرنے کا الزام لگایا جبکہ دیگر نے اسے ڈیجیٹل کلچر کا حصہ قرار دیا۔ اعداد و شمار کے مطابق، اس واقعے کے فوراً بعد انفلوئنسر کے تقریباً ایک لاکھ چالیس ہزار فالوورز کم ہوگئے اور لائیو سیشنز میں ملنے والے عطیات میں بھی کمی آئی۔ بعض برانڈز نے ان کے ساتھ اشتہاری معاہدوں پر نظرِ ثانی شروع کردی ہے۔
ماہرین کے مطابق یہ واقعہ اس حقیقت کی یاد دہانی ہے کہ سوشل میڈیا پر دکھائی جانے والی خوبصورتی ہمیشہ سچی نہیں ہوتی اور نوجوانوں کو ڈیجیٹل دنیا اور حقیقی زندگی کے فرق کو سمجھنا چاہیے۔ فی الحال انفلوئنسر کی جانب سے اس معاملے پر کوئی باضابطہ بیان سامنے نہیں آیا۔
