میرپور ( کشمیر ڈیجیٹل) سابق صدر آزاد جموں وکشمیر سردار مسعود خان نے کہا ہے کہ نوجوانوں کو معیاری تعلیم فراہم کرنا، انہیں بااختیار بنانا اور کشمیر کی آزادی کی تحریک کیساتھ وابستگی کو فروغ دینا پاکستان کی ترقی، قومی یکجہتی اورخوشحالی کے بنیادی ستون ہیں ۔ ان خیالات کا اظہار انہوں نےمیرپور محی الدین اسلامک میڈیکل کالج میں تقریب سے خطاب کرتے ہوئے کیا ۔
سردار مسعود خان نے فارغ التحصیل طلبہ اور ان کے والدین کو تعلیم میں محنت، استقامت اور قربانیوں پر مبارکباد دی اوران کی کوششوں کو سراہا ۔ انہوں نے کہا کہ ترقی یافتہ اور ترقی پذیر ممالک کے درمیان بنیادی فرق تعلیمی معیار اور انسانی وسائل کی ترقی میں مضمر ہے ۔
پاکستان ذہنی صلاحیتوں سے مالا مال ملک ہے، جو تعلیم اور ہنرمندی میں مسلسل سرمایہ کاری کے ذریعے عالمی برادری میں ممتاز مقام حاصل کر سکتا ہے ۔
انہوں نے کالج کے سرپرستِ اعلیٰ پیر سلطان العارفین صدیقی اور ان کے خاندان کی روحانی، تعلیمی اور فلاحی خدمات کو خراج تحسین پیش کیا ۔ سردار مسعود خان نے کہا کہ اس خاندان نے آزاد جموں و کشمیر میں روحانی بیداری، سماجی بہبود اور تعلیمی فروغ میں تاریخی کردار ادا کیا ۔
مزید یہ بھی پڑھیں:پاکستان کی عالمی سطح پر سفارتی کامیابیاں، بھارت تنہائی کا شکارہے:سردار مسعود
انہوں نے پیر علاوالدین صدیقی اور ان کے خاندان سے لندن میں ملاقاتوں کا ذکر کرتے ہوئے کہا کہ یہ خاندان بین الاقوامی کانفرنسوں اور تعلیمی سرگرمیوں کے ذریعے کشمیری عوام کے حق خودارادیت کو عالمی سطح پر اجاگر کرنے میں قابلِ قدر خدمات انجام دے چکا ہے ۔
سردار مسعود خان نے قومی یکجہتی کے فروغ میں تعلیمی اداروں کے کردار پر روشنی ڈالتے ہوئے کہا کہ کالج میں گلگت بلتستان، خیبر پختونخوا، پنجاب اور دیگر علاقوں کے طلبہ زیرِ تعلیم ہیں ۔
ان کے مطابق یہ قسم کے تعلیمی تبادلے قومی اتحاد اور ہم آہنگی کو مضبوط کرتے اور ملک کے اجتماعی چیلنجز کے حل کیلئےمشترکہ حکمت عملی کو تقویت دیتے ہیں ۔
پاکستان کی نوجوان آبادی پر بات کرتے ہوئے انہوں نے کہا کہ تقریباً 60 فیصد آبادی نوجوانوں پر مشتمل ہے، جو ملک کی قیادت اور ترقی کی اصل قوت ہیں۔
طلبہ کو مشورہ دیا گیا کہ وہ اعتماد، ایمان اور عزم کیساتھ پاکستان کو معاشی طور پر خوشحال، دفاعی اعتبار سے مضبوط اور سماجی طور پر ترقی یافتہ بنانے میں اپنا کردار ادا کریں اور اسلامی اقدار، ہمدردی اور خدمت انسانیت کو ہمیشہ مقدم رکھیں ۔
مزید یہ بھی پڑھیں:ایس سی او اجلاس میں پاکستان کے مؤقف کی جیت، بھار تی پروپیگنڈا ناکام ہوا:سردار مسعود خان
آخر میں انہوں نے میڈیکل گریجویٹس کو پیشے سے جڑی اخلاقی ذمہ داریوں کی یاد دہانی کرائی اور کہا کہ وہ بقراطی حلف کی پاسداری، دیانتداری اور ہمدردی کے ساتھ انسانیت کی خدمت کریں ۔
