محکمہ موسمیات نے پاکستان میں رمضان المبارک 1447 ہجری کا چاند نظر آنے کے حوالے سے اہم پیش گوئی جاری کر دی ہے، جس کے مطابق ملک میں 18 فروری 2026 کو ماہِ صیام کا چاند نظر آنے کا قوی امکان ظاہر کیا گیا ہے۔
ماہرینِ موسمیات کا کہنا ہے کہ فلکیاتی حساب کتاب کے مطابق رمضان کے چاند کی پیدائش 17 فروری 2026 کو پاکستانی وقت کے مطابق شام 5 بج کر 01 منٹ پر ہوگی، جبکہ 29 شعبان المعظم یعنی 18 فروری کی شام کو اسے آسمان پر دیکھے جانے کے امکانات انتہائی روشن ہیں۔
یہ بھی پڑھیں: رمضان سے قبل گیس کا بحران، منافع خوروں نے قیمتیں 4 ہزار تک پہنچا دیں
تفصیلات کے مطابق، موسمیاتی ماہرین نے پیش گوئی کی ہے کہ 18 فروری کو پاکستان کے بیشتر علاقوں میں مطلع صاف یا جزوی طور پر ابر آلود رہنے کی توقع ہے، جو چاند کی رویت کے لیے سازگار حالات فراہم کرے گا۔ محکمہ موسمیات کی جانب سے جاری کردہ رپورٹ میں مختلف صوبوں اور علاقوں کے لیے چاند دیکھنے کے آخری اوقات کی فہرست بھی جاری کی گئی ہے تاکہ شہری اور رویتِ ہلال کمیٹیاں بروقت مشاہدہ کر سکیں۔
جاری کردہ شیڈول کے مطابق، آزاد کشمیر میں چاند دیکھنے کا آخری وقت شام 6 بج کر 58 منٹ مقرر کیا گیا ہے، جبکہ گلگت بلتستان میں یہ وقت شام 6 بج کر 53 منٹ ہوگا۔ اسی طرح پنجاب میں شام 7 بج کر 08 منٹ، خیبر پختونخوا میں 7 بج کر 13 منٹ، اور سندھ میں شام 7 بج کر 24 منٹ تک چاند دیکھا جا سکے گا۔ بلوچستان کے علاقوں میں چاند دیکھنے کا آخری وقت شام 7 بج کر 47 منٹ بتایا گیا ہے۔
مزید پڑھیں: رمضان کے دوران قیمتوں میں اضافے کی درخواستیں مسترد، انتظامیہ کے دعوے اور عوامی حقائق میں تضاد
محکمہ موسمیات کی اس رپورٹ نے رمضان المبارک کی تیاریوں میں مصروف شہریوں میں خوشی کی لہر دوڑا دی ہے، تاہم ماہِ مقدس کے آغاز کا حتمی اعلان مرکزی رویتِ ہلال کمیٹی کی جانب سے شہادتوں کی وصولی کے بعد ہی کیا جائے گا۔
