سعودی عرب کے دارالحکومت ریاض میں ورلڈ ڈیفنس شو بھرپور انداز میں جاری ہےجو عالمی دفاعی صنعت کے رہنماؤں، پالیسی سازوں، عسکری ماہرین اور سرمایہ کاروں کی توجہ کا مرکز بنا ہوا ہے۔
یہ عالمی دفاعی نمائش خادمِ حرمین شریفین شاہ سلمان بن عبدالعزیز آل سعود کی سرپرستی میں منعقد کی جا رہی ہے۔
ورلڈ ڈیفنس شو کی افتتاحی تقریب کا باضابطہ افتتاح سعودی عرب کے وزیرِ دفاع شہزادہ خالد بن سلمان بن عبدالعزیز نے کیا۔
یہ بھی پڑھیں: دبئی ایئر شو :دوست ملک کی جے ایف 17 تھنڈر کی خریداری میں دلچسپی،معاہدے پردستخط
اس عالمی نمائش کا اہتمام جنرل اتھارٹی فار ملٹری انڈسٹریز کے تحت کیا گیا ہے، جس میں دنیا بھر سے درجنوں ممالک کی دفاعی کمپنیاں شرکت کر رہی ہیں۔
نمائش میں فضائی، بری، بحری، خلائی اور سکیورٹی کے شعبوں میں جدید دفاعی ٹیکنالوجیز، ہتھیاروں کے نظام اور جدید سکیورٹی حل پیش کیے جا رہے ہیں۔
ورلڈ ڈیفنس شو اس وقت عالمی دفاعی صنعت کے لیے ایک اہم پلیٹ فارم کی حیثیت اختیار کر چکا ہے، جہاں مستقبل کے دفاعی تقاضوں اور مشترکہ سلامتی کے چیلنجز پر تبادلۂ خیال کیا جا رہا ہے۔
ورلڈ ڈیفنس شو میں پاکستان کا پویلین بھی نمایاں طور پر قائم کیا گیا ہے، جہاں پاکستان کی دفاعی صنعت سے وابستہ قریباً 15 سے 20 معروف ادارے اور کمپنیاں اپنی جدید دفاعی مصنوعات، ٹیکنالوجی اور صلاحیتوں کا عملی مظاہرہ کر رہی ہیں۔
پاکستانی پویلین کو عالمی وفود کی جانب سے غیر معمولی دلچسپی اور بھرپور پذیرائی حاصل ہو رہی ہے۔وزیرِ دفاع خواجہ محمد آصف اور وفاقی وزیرِ مملکت برائے داخلہ طلال چوہدری پاکستانی پویلین کا دورہ کیا۔
یہ بھی پڑھیں: دبئی ائیر شو میں بھارتی طیارہ تیجس گر کر تباہ، عوام کا شدید ردعمل
اس موقع پر سعودی عرب میں پاکستان کے سفیر، اعلیٰ سفارتی و عسکری حکام، دفاعی ماہرین اور پاکستانی وفد کے دیگر ارکان بھی موجود تھے۔
پاکستان عالمی دفاعی منڈی میں اپنی شناخت مضبوط بنا رہا ہے، وزیر دفاع
وزیر دفاع خواجہ محمد آصف نے اس موقع پر گفتگو کرتے ہوئے کہاکہ پاکستان دفاعی ٹیکنالوجی کے شعبے میں تیزی سے ترقی کررہا ہے اور عالمی دفاعی منڈی میں اپنی شناخت مضبوط بنا رہا ہے۔
انہوں نے کہاکہ ورلڈ ڈیفنس شو جیسے عالمی پلیٹ فارمز پاکستانی دفاعی صنعت کے لیے بین الاقوامی تعاون، شراکت داری اور دفاعی برآمدات کے نئے مواقع فراہم کرتے ہیں۔
نمائش سے برآمدات میں اضافہ ہوگا، طلال چوہدری
وفاقی وزیر مملکت برائے داخلہ طلال چوہدری نے کہاکہ ورلڈ ڈیفنس شو میں پاکستان کی شرکت پاکستان اور سعودی عرب کے درمیان مضبوط دفاعی اور اسٹریٹجک تعلقات کی واضح عکاس ہے، اور اس سے دونوں برادر ممالک کے درمیان دفاعی تعاون کو مزید فروغ حاصل ہوگا۔
انہوں نے کہاکہ عالمی دفاعی نمائش میں ہمارے ادارے جو کردار ادا کررہے ہیں، اس سے آنے والے وقت میں برآمدات میں اضافہ ہوگا۔
ورلڈ ڈیفنس شو سعودی عرب کے ویژن 2030 کے اہداف کے مطابق دفاعی صنعت کو مقامی سطح پر فروغ دینے، جدید ٹیکنالوجی کے حصول اور عالمی سرمایہ کاری کو راغب کرنے کی ایک اہم کوشش ہے۔
افتتاحی تقریب کے بعد ایئر شو کا بھی شاندار مظاہرہ کیا گیا، جس میں مختلف طیاروں نے فضائی کرتب دکھائے۔ ایئر شو نے شرکا اور تماشائیوں کو بے حد متاثر کیا اور نمائش کے ماحول کو مزید پرجوش بنا دیا۔
