پاکستان میں نئی گاڑی خریدنے کے خواہشمند صارفین کے لیے ایک اہم پیش رفت سامنے آئی ہےجس میں ایم سی بی بینک نے سوزوکی موٹر کمپنی کے تعاون سے نئی سوزوکی گاڑیوں کے لیے آٹو فنانسنگ پروگرام متعارف کروا دیا ہے۔
یہ فنانسنگ سہولت Car4U اور Fleet4U پلیٹ فارمز کے تحت فراہم کی جا رہی ہے، جس کا مقصد صارفین کو منظم اور شفاف قرض کی سہولت کے ذریعے سوزوکی کی مسافر اور کمرشل گاڑیاں حاصل کرنے میں مالی معاونت فراہم کرنا ہے۔
یہ بھی پڑھیں: سوزوکی سوئفٹ اقساط پر خریدنے کیلئے اسکیم متعارف
ایم سی بی بینک کی جانب سے متعارف کردہ اس آٹو فنانسنگ پروگرام کے تحت سوزوکی کی مختلف گاڑیوں کے لیے مخصوص شرائط و ضوابط کے ساتھ قرض کی سہولت دی جائے گی۔ بینک کے مطابق اس اسکیم میں فنانسنگ کا مارک اپ ریٹ ایک سالہ KIBOR کے ساتھ 3 فیصد مقرر کیا گیا ہے، جبکہ انشورنس کی قیمت 1.50 فیصد رکھی گئی ہے۔
MCB Car4U فنانسنگ کے تحت اہل صارفین کو ذاتی استعمال کے لیے سوزوکی گاڑی حاصل کرنے کی سہولت فراہم کی جائے گی، جس میں تین سال تک کی لچکدار قسطوں کا آپشن شامل ہے۔ اس پروگرام کے تحت انفرادی گاڑی کی خریداری کے لیے فنانسنگ کی حد 3 ملین روپے تک مقرر کی گئی ہے، جس کے ذریعے صارفین آسان اقساط میں گاڑی حاصل کر سکتے ہیں۔
دوسری جانب کمرشل اور بڑے بیڑے کی خریداری کے لیے MCB Fleet4U فنانسنگ متعارف کرائی گئی ہے، جس کے تحت کاروباری صارفین اور اداروں کو 30 ملین روپے تک کی فنانسنگ سہولت دستیاب ہوگی۔ اس پلیٹ فارم کے ذریعے کمرشل مقاصد کے لیے سوزوکی گاڑیوں کی خریداری ممکن بنائی گئی ہے۔
مزید پڑھیں: سوزوکی پاکستان کا سرٹیفائیڈ استعمال شدہ گاڑیوں کا پروگرام لانچ
ایم سی بی بینک کے مطابق اس آٹو فنانسنگ پروگرام کے تحت سوزوکی گاڑیاں خریدنے والے صارفین کو ترجیحی ڈیلیوری کی سہولت بھی فراہم کی جائے گی۔ بینک کا کہنا ہے کہ یہ پیشکش 31 مارچ 2026 تک دستیاب رہے گی، جبکہ اس پر ایم سی بی بینک کی معیاری شرائط و ضوابط لاگو ہوں گے۔
