کیا آپ نے کبھی سوچا ہے کہ چند خشک میوہ جات کھانے سے آپ کے بلڈ شوگر پر قابو پایا جا سکتا ہے اور ٹائپ 2 ذیا بیطس کے خطرات کم ہو سکتے ہیں؟ حالیہ تحقیق اس حوالے سے دلچسپ نتائج سامنے لے کر آئی ہے۔
بی ایم سی نیوٹریشن اینڈ میٹابولزم میں شائع تحقیق کے مطابق، روزانہ خشک میوہ جات کا معمولی استعمال — جیسے ایک آلو بخارہ، ایک خشک خوبانی اور چند کشمش ، ذیا بیطس کے خطرات کو 60 فیصد تک کم کرنے میں مددگار ہو سکتا ہے۔
تحقیق میں بتایا گیا کہ خشک میوہ جات میں موجود فائبر خون میں شوگر کی سطح کو کنٹرول میں رکھنے میں مدد دیتا ہے اور ہاضمے کو بہتر بناتا ہے۔ اس کے علاوہ، یہ میوہ جات فلیونائیڈز سے بھی بھرپور ہوتے ہیں، جو انسولین کی حساسیت بڑھانے اور جسم میں سوزش کو کم کرنے میں اہم کردار ادا کرتے ہیں۔
یہ بھی پڑھیں: مضر صحت گوشت فروخت کرنیوالے قصابوں کیخلاف ایکشن، 2 دکانیں سیل
محققین نے یو کے بائیو بینک کے تقریباً پانچ لاکھ افراد کے ڈیٹا کا جائزہ لیا۔ اس میں 4 لاکھ 21 ہزار 764 افراد نے روزانہ کھائے جانے والے خشک میوہ جات کے بارے میں سوالنامے بھرتے ہوئے اپنی معلومات فراہم کیں۔ ہر سوالنامے میں ایک آلو بخارہ، ایک خوبانی اور 10 کشمش کو ایک پورشن کے طور پر شمار کیا گیا۔
ماہرین کا کہنا ہے کہ خشک میوہ جات کو روزانہ اپنی خوراک میں شامل کرنا بلڈ شوگر کنٹرول رکھنے کے ساتھ ساتھ دل کی بیماریوں اور دیگر میٹابولک خطرات کو کم کرنے میں بھی مددگار ثابت ہو سکتا ہے۔ تاہم، احتیاط کے ساتھ اور اعتدال میں استعمال ضروری ہے۔
مزید پڑھیں:گرم دودھ میں دیسی گھی ڈال کر پینے کے حیرت انگیز فوائد
یہ تحقیق یاد دلاتی ہے کہ چھوٹی غذائی عادات بھی صحت کے بڑے فوائد فراہم کر سکتی ہیں، اور ہر شخص کے لیے روزانہ کی خوراک میں خشک میوہ جات کو شامل کرنا ایک آسان اور مؤثر قدم ہو سکتا ہے۔
