(5 جنوری 2026): عالمی مارکیٹ میں جاری اضافے کے رجحان کے بعد پاکستان میں بھی سونے اور چاندی کی قیمتوں میں نمایاں اضافہ ریکارڈ کیا گیا ہے، جس کے باعث قیمتی دھاتیں نئی بلند ترین سطح پر پہنچ گئی ہیں۔
اے آر وائی نیوز کے مطابق عالمی سطح پر سونے اور چاندی کی قیمتوں میں مسلسل اضافہ دیکھا جا رہا ہے، جس کا براہِ راست اثر مقامی مارکیٹ پر پڑ رہا ہے۔ آج کاروباری ہفتے کے پہلے روز پاکستان میں سونے اور چاندی دونوں کی قیمتوں میں بڑا اضافہ سامنے آیا ہے۔
گزشتہ کاروباری ہفتے کے آخری روز سنیچر کو سونے اور چاندی کی قیمتوں میں کمی ریکارڈ کی گئی تھی۔ اس دن فی تولہ سونے کی قیمت میں 4700 روپے جبکہ فی تولہ چاندی کی قیمت میں 106 روپے کی کمی ہوئی تھی، تاہم نئے ہفتے کے آغاز پر صورتحال یکسر تبدیل ہو گئی۔
عالمی مارکیٹ میں آج فی اونس سونے کی قیمت 92 ڈالر اضافے کے بعد 4424 ڈالر تک پہنچ گئی۔ عالمی قیمت میں اس نمایاں اضافے کے نتیجے میں پاکستان میں سونے کی قیمت میں فی تولہ 9200 روپے جبکہ 10 گرام سونے کی قیمت میں 7888 روپے کا اضافہ ریکارڈ کیا گیا۔
یہ بھی پڑھیں: آڈی پاکستان نے جدید الیکٹرک گاڑی متعارف کرا دی
اس اضافے کے بعد ملک میں فی تولہ سونے کی نئی قیمت 4 لاکھ 64 ہزار 762 روپے ہو گئی ہے، جبکہ 10 گرام سونا 3 لاکھ 98 ہزار 458 روپے میں فروخت ہو رہا ہے۔
چاندی کی قیمتوں میں بھی عالمی مارکیٹ کے اثرات واضح طور پر دیکھے گئے ہیں۔ عالمی سطح پر چاندی کی قیمت میں اضافے کے بعد پاکستان میں فی تولہ چاندی کی قیمت میں 267 روپے کا اضافہ ہوا، جس کے بعد فی تولہ چاندی کی نئی قیمت 8023 روپے تک پہنچ گئی ہے۔
یہ بھی پڑھیں:ملک میں سونے کی قیمتوں میں کمی، فی تولہ سونا ساڑھے پانچ ہزار روپے سستا
واضح رہے کہ سونا روایتی طور پر محفوظ سرمایہ کاری سمجھا جاتا ہے۔ افراطِ زر، سیاسی اور معاشی عدم استحکام کے دوران سونے کی قیمت میں اضافہ دیکھا جاتا ہے۔ صدیوں سے سونے کو کرنسی اور دولت کی ایک مستحکم شکل کے طور پر استعمال کیا جاتا رہا ہے، اور جب سرمایہ کار دیگر اثاثوں کے حوالے سے غیر یقینی صورتحال کا سامنا کرتے ہیں تو وہ سونے کی طرف رجوع کرتے ہیں۔
