اسلام آباد(کشمیر ڈیجیٹل) ملک بھر میں یوٹیلیٹی اسٹورز کے 3 ہزار سے زائد ڈیلی ویجز ملازمین کی برطرفیوں کا معاملہ شدت اختیار کر گیا۔ ڈیلی ویجز ملازمین اور انتظامیہ کے درمیان مذاکرات کسی حتمی نتیجے پر نہ پہنچ سکے ، برطرفیوں کے معاملے پر مذاکرات کا پہلا دور ناکام ہو گیا۔
ملازمین کے یونینز لیڈروں نے یوٹیلیٹی اسٹورز کارپوریشن کمیٹی سے مطالبہ کیا کہ برطرف ڈیلی ویجز ملازمین کے آڈرز فوری طور پر واپس لئے جائیں۔ تاہم یوٹیلیٹی اسٹورز کارپوریشن کی مذاکراتی کمیٹی نے یونینز کے مطالبات تسلیم کرنے سے گریز کیا جس کے نتیجے میں مذاکرات بغیر کسی پیشرفت کے ختم ہو گئے۔
یونینز لیڈران کا کہنا ہے کہ اگر مطالبات تسلیم نہ کیے گئے تو 27 فروری کو ملک گیر دھرنا اور احتجاج کیا جائے گا۔ یونین نمائندوں نے اعلان کیا کہ اس احتجاج میں ملک بھر سے یوٹیلیٹی اسٹورز کے ملازمین شرکت کریں گے اور جب تک ان کے مطالبات پورے نہیں ہوتے تب تک احتجاج جاری رہے گا۔
مذاکرات کا دوسرا دور کل دوبارہ ہوگا جس میں کسی حتمی فیصلے کی توقع کی جا رہی ہے۔ تاہم، اگر یہ مذاکرات بھی ناکام رہے تو ملک بھر میں یوٹیلیٹی اسٹورز کے ملازمین کی جانب سے شدید احتجاج اور دھرنے کا امکان ہے۔
رمضان سے قبل وادی لیپہ سے یوٹیلٹی اسٹور چناری منتقل کرنے کی تیاریاں
