واشنگٹن :امریکا کے صدر ڈونلڈ ٹرمپ نے حال ہی میں 900 ارب ڈالر کے قومی دفاعی بل پر دستخط کردئیے ہیں، جس کے بعد یہ بل قانونی شکل اختیار کر گیا ہے ۔
اس اقدام کے ساتھ ہی صدر نے نہ صرف امریکی فوج کی استعداد کار میں اضافہ کے لیے اہم قدم اٹھایا بلکہ فوجیوں کی مالی بہتری کو بھی یقینی بنایا ۔
وائٹ ہاؤس کی ترجمان اینا کیلی نے بتایا کہ اس بل کے تحت امریکی فوجیوں کی تنخواہیں بڑھائی جائیں گی تاکہ وہ اپنے اہم فرائض بہتر طریقے سے انجام دے سکیں ۔
یہ بل امریکا کے ’’پیس تھرو اسٹرینتھ ایجنڈا‘‘ کا حصہ ہے، جس کا مقصد ملکی دفاعی صلاحیت کو مضبوط بنانا اور عالمی سطح پر امریکی سکیورٹی کی بالادستی کو برقرار رکھنا ہے ۔
مزید یہ بھی پڑھیں:10 ماہ میں 8 جنگیں رکوائیں، وہ کیا جو کوئی نہ کرسکا: امریکی صدر ڈونلڈ ٹرمپ
اس کے علاوہ بل میں گولڈن ڈوم فضائی اور میزائل دفاعی نظام کے لیے بھی فنڈز مختص کیے گئے ہیں ، جو امریکا کی فضائی دفاعی صلاحیت کو مزید بہتر بنائیں گے ۔
یہ جدید دفاعی نظام امریکا کو ممکنہ خطرات سے نمٹنے میں مدد فراہم کرے گا اور ملک کی قومی سلامتی کومزید مضبوط کرے گا ۔
قانون سازوں کے مطابق یہ بل نہ صرف دفاعی بجٹ کی منظوری دے گا بلکہ آنے والے سال کے لیے امریکا کی قومی سلامتی اور خارجہ پالیسی کی ترجیحات کو بھی واضح کرتا ہے ۔
اس میں یہ تعین کیا جاتا ہے کہ ملک کے لیے کون سے دفاعی منصوبے اہم ہیں اور کہاں سرمایہ کاری کرنا زیادہ ضروری ہے ۔ اس طرح، نیشنل ڈیفنس آتھرائزیشن ایکٹ امریکا کی خارجہ پالیسی اور فوجی تیاری کے لیے ایک رہنما دستاویز کے طور پر کام کرتا ہے ۔
امریکی صدر کا یہ اقدام اس بات کا مظہر ہے کہ امریکا اپنی فوجی قوت اور عالمی دفاعی حکمت عملی کو فروغ دینے کے لیے مسلسل کوشاں ہے تاکہ ملک کو ہر ممکنہ خطرے سے محفوظ بنایا جا سکے ۔
