روس نے یوکرین کے مختلف علاقوں پر ہائپرسونک میزائلوں اور ڈرونز کے ذریعے شدید حملہ کیا، جس میں فوجی اور توانائی سے متعلق اہم تنصیبات کو نشانہ بنایا گیا۔ اس حملے کے نتیجے میں ملک بھر میں 10 لاکھ سے زائد گھر بجلی سے محروم ہو گئے۔
یوکرینی حکام کے مطابق ہفتے اور اتوار کی درمیانی شب روسی افواج نے حملوں کا ایک بڑا سلسلہ شروع کیا، جس میں توانائی، صنعتی اور بنیادی انفرااسٹرکچر کو نشانہ بنایا گیا۔ متعدد علاقوں میں بجلی کی فراہمی منقطع ہوئی جبکہ شہری تنصیبات کو بھی نقصان پہنچا۔
یوکرین کے صدر ولودومیر زیلنسکی نے کہا کہ ’روس نے رات گئے حملوں میں 450 سے زیادہ ڈرونز اور 30 میزائل استعمال کیے، جن میں جدید ہتھیار بھی شامل تھے‘۔ انہوں نے مزید کہا کہ ’روسی حملوں کا مقصد یوکرین کے توانائی نظام کو مفلوج کرنا اور شہری آبادی کو خوف میں مبتلا کرنا ہے‘۔
یوکرین کے وزیر داخلہ کے مطابق روسی حملوں میں کم از کم 5 مختلف علاقوں کو نشانہ بنایا گیا، جس کے نتیجے میں 5 افراد زخمی ہوئے۔ متاثرہ علاقوں میں آگ بجھانے، ملبہ ہٹانے اور بجلی کی بحالی کا کام ہنگامی بنیادوں پر جاری ہے۔ بعض مقامات پر توانائی تنصیبات کو شدید نقصان پہنچا ہے، جس سے بحالی کے عمل میں وقت لگ سکتا ہے۔
یہ بھی پڑھیں: بھارتی پراکسی فتنہ الخوارج کی نئی کارروائی، کواڈ کاپٹر گرنے سے3 کم عمر لڑکے شہید، ایک زخمی
روسی وزارت دفاع نے بیان میں دعویٰ کیا کہ یہ حملے روسی علاقوں میں شہری اہداف پر یوکرین کے حملوں کے جواب میں کیے گئے۔ روسی وزارت دفاع کے مطابق ’یوکرین میں فوجی اور توانائی سے متعلق تنصیبات کو نشانہ بنایا گیا تاکہ یوکرینی فوجی صلاحیت کو کمزور کیا جا سکے‘۔
روسی حکام نے مزید بتایا کہ حملوں میں کنزال ہائپرسونک میزائل سمیت جدید ہتھیاروں کا استعمال کیا گیا، جو انتہائی تیز رفتار اور درست نشانہ لگانے کی صلاحیت رکھتے ہیں۔ روس کے دعوے کے مطابق تمام مقررہ اہداف کو کامیابی سے نشانہ بنایا گیا۔
یہ بھی پڑھیں:یوکرین جنگ خاتمے کیلئے اہم پیشرفت، ٹرمپ منصوبے کو بڑی حمایت مل گئی
ادھر یوکرینی حکام نے عالمی برادری سے مطالبہ کیا ہے کہ روسی حملوں کا سخت نوٹس لیا جائے اور یوکرین کے توانائی انفرااسٹرکچر کے تحفظ کے لیے فضائی دفاعی نظام کی فراہمی میں مدد کی جائے۔
