اسلام آباد: وزیر دفاع خواجہ آصف نے کہا ہے کہ قوم برسوں فیض حمید اور جنرل باجوہ کے بوئے ہوئے بیجوں کی فصل کاٹے گی۔
سابق ڈی جی آئی ایس آئی لیفٹیننٹ جنرل (ر) فیض حمید کی 14 سال قید بامشقت سزا پر وزیر دفاع نے سماجی رابطے کی سائٹ ایکس پر ردعمل دیا۔ خواجہ آصف نے لکھا: “قوم برسوں فیض حمید اور جنرل باجوہ کے بوئے ہوئے بیجوں کی فصل کاٹے گی۔”
خواجہ آصف نے مزید کہا: “اللہ ہمیں طاقت اور اقتدار کو اللہ کی عطا سمجھ کر اس کی مخلوق کے لیے استعمال کی توفیق عطا فرمائے، اللہ ہمیں معاف کرے، خوف خدا حکمرانوں کا شیوہ بنے، آمین۔”
واضح رہے کہ سابق ڈی جی آئی ایس آئی فیض حمید کو 14 سال قید بامشقت کی سزا سنائی گئی ہے، جس کا اطلاق 11 دسمبر 2025 سے ہوگا۔سابق لیفٹیننٹ جنرل فیض حمید کے خلاف فیلڈ جنرل کورٹ مارشل کی کارروائی 15 ماہ بعد مکمل ہوئی، جس کے نتیجے میں انہیں 14 سال قید بامشقت کی سزا سنائی گئی۔ ان پر سیاسی سرگرمیوں، آفیشل سیکریٹس ایکٹ کی خلاف ورزی، اختیارات کے غلط استعمال اور افراد کو نقصان پہنچانے کے چار سنگین الزامات تھے۔ مقدمے میں انہیں مکمل قانونی دفاع کے حقوق فراہم کیے گئے اور سیاسی سرگرمیوں میں کردار کی الگ تحقیقات بھی جاری ہیں۔ یہ فیصلہ پاک فوج میں اعلیٰ افسران کے لیے شفافیت اور احتساب کی اہم مثال ہے۔
