عالمی اور مقامی مارکیٹ میں سونا آج بھی سستا ہو گیا۔ عالمی مارکیٹ میں سونا 10 ڈالر سستا ہو کر 3970 ڈالر فی اونس تک گر گیا۔ مقامی مارکیٹ میں ایک تولہ سونا ایک ہزار روپے سستا ہو کر 4 لاکھ 19 ہزار 362 روپے کا ہو گیا جبکہ 10 گرام سونا 857 روپے کی کمی سے 3 لاکھ 59 ہزار 535 روپے کا ہو گیا۔
آل پاکستان صرافہ جیمز اینڈ جیولرز ایسوسی ایشن کے مطابق، 1000 روپے کی کمی کے بعد 24 کیرٹ فی تولہ سونا 4 لاکھ 19 ہزار 362 روپے پر آگیا ہے، جبکہ 10 گرام سونے کی قیمت 857 روپے کم ہو کر 3 لاکھ 59 ہزار 535 روپے ہو گئی ہے۔ دوسری طرف فی تولہ چاندی کی قیمت 5022 روپے پر برقرار رہی۔
گزشتہ روز بھی سونے کی قیمت میں بڑی کمی ریکارڈ کی گئی تھی جب فی تولہ سونا 3500 روپے سستا ہو کر 4 لاکھ 20 ہزار 362 روپے کا ہو گیا تھا۔ اسی طرح 10 گرام سونے کے نرخ میں 3001 روپے کمی کے بعد قیمت 3 لاکھ 60 ہزار 392 روپے تک پہنچ گئی تھی۔
یہ بھی پڑھیں: پراڈا کا مہنگا سیفٹی پن: عام سی چیز نے سب کے ہوش اڑا دیے
یاد رہے کہ دو روز قبل مقامی مارکیٹ میں فی تولہ سونا 1300 روپے مہنگا ہوا تھا جس کے بعد قیمت 4 لاکھ 23 ہزار 862 روپے تک جا پہنچی تھی، جبکہ 10 گرام سونا 1115 روپے مہنگا ہو کر 3 لاکھ 63 ہزار 393 روپے ہو گیا تھا۔ ماہرین کے مطابق عالمی مالیاتی منڈیوں میں غیر یقینی صورتحال، ڈالر کے اتار چڑھاؤ اور بین الاقوامی سرمایہ کاروں کی جانب سے سونے میں سرمایہ کاری کے بڑھتے رجحان کے باعث قیمتوں میں مسلسل تغیر و تبدل دیکھنے میں آ رہا ہے۔
صرافہ ایسوسی ایشن کا کہنا ہے کہ اگر عالمی مارکیٹ میں تیزی کا رجحان برقرار رہا تو مقامی مارکیٹ میں بھی سونے کی قیمتوں میں دوبارہ اضافہ ممکن ہے۔ تاہم ڈالر ریٹ، بین الاقوامی حالات اور طلب و رسد کے اثرات کو نظر انداز نہیں کیا جا سکتا۔
یہ بھی پڑھیں: سونے کی قیمت میں 3500 روپے کی کمی، فی تولہ کتنے کا ہوگیا؟
ورلڈ گولڈ کونسل کے مطابق دنیا بھر میں سونے کے ذخائر کے حوالے سے امریکا پہلے، چین ایشیا میں پہلے اور بھارت دوسرے نمبر پر ہے جبکہ پاکستان عالمی فہرست میں 49ویں نمبر پر موجود ہے۔ رپورٹ کے مطابق مختلف ممالک کے مرکزی بینکوں نے 2024ء میں 1,000 میٹرک ٹن سے زائد سونا خریدا جو پچھلی دہائی کی اوسط سالانہ خریداری سے تقریباً دوگنا ہے۔
