سیول (کشمیر ڈیجیٹل) چینی صدر شی جن پنگ نے اپنے جنوبی کورین ہم منصب لی جائے میونگ کو دو سمارٹ فونز کا تحفہ دیا اور اسی موقع پر ازراہِ تفنن کہا کہ “انہیں چیک کر لیں، کہیں اس میں بیک ڈور تو نہیں، یعنی اس سے جاسوسی تو نہیں ہو گی۔”
فرانسیسی خبر رساں ادارے اے ایف پی کے مطابق ہلکے پھلکے جملوں کا یہ تبادلہ دونوں رہنماؤں کے درمیان شہر جیونگجو میں ملاقات کے دوران ہوا، جہاں چینی صدر ایشیا پیسفک اکنامک کوآپریشن (ایپک) کے اجلاس میں شرکت کے لیے پہنچے۔ یہ گیارہ سال میں ان کا جنوبی کوریا کا پہلا دورہ ہے۔
صدر شی جن پنگ نے جب شیاؤمی کمپنی کے تیار کردہ دو فون صدر لی جائے میونگ کو دیے تو جنوبی کورین صدر نے مزاحیہ انداز میں پوچھا، “رابطے کی لائن محفوظ تو ہے نا؟” اس پر صدر شی جن پنگ اپنی ہنسی نہ روک پائے اور فونز کی طرف اشارہ کرتے ہوئے کہا، “آپ کو اسے چیک کرنا چاہیے کہ آیا اس میں کوئی بیک ڈور موجود ہے۔” ان کا اشارہ ان سافٹ ویئرز کی طرف تھا جو کسی تھرڈ پارٹی کو مانیٹرنگ یا نگرانی کی اجازت دیتے ہیں۔
صدر لی جائے میونگ کی ہنسی گونجی اور انہوں نے تالیاں بجا کر صدر شی کی حس مزاح کی داد دی۔ مختصر جملوں پر مشتمل اس واقعے نے عالمی میڈیا میں دلچسپی پیدا کر دی، کیونکہ صدر شی جن پنگ عام طور پر سنجیدہ طبیعت کے مالک ہیں اور ان کی جانب سے مزاح کا مظاہرہ شاذ و نادر ہی دیکھنے کو ملتا ہے۔ خاص طور پر “جاسوسی” جیسے حساس موضوع پر ان کی یہ بات غیر متوقع تھی۔
اس واقعے کے بعد میڈیا نے بھی اس پر پرکشش سرخیاں لگائیں۔ روزنامہ سیول شنمن نے پیر کے روز لکھا، “شیاؤمی فون کے ذریعے جاسوسی کے مذاق پر صدر شی کی ہنسی چھوٹ گئی۔”
یہ بھی پڑھیں: خاتون ڈی ایس پی سہیلی کے گھر سے 2 لاکھ نقد،موبائل چُرا کر فرار
ان جملوں کی ویڈیو بھی یوٹیوب پر وائرل ہو چکی ہے، جس نے صارفین کی بھرپور توجہ حاصل کی۔ اب تک اس ویڈیو پر 800 سے زائد تبصرے ہو چکے ہیں، جن میں بیشتر صارفین نے اس دلچسپ لمحے پر حیرت اور لطف کا اظہار کیا۔ ایک صارف ہینڈل 021835 سے لکھتا ہے، “ایسا لگ رہا ہے جیسے دو مارشل آرٹس کے استاد مقابلے سے قبل جملے بول رہے ہیں۔”
صدر لی جائے میونگ کے ترجمان کم نوم جون نے کہا کہ یہ واقعہ اس بات کی نشاندہی کرتا ہے کہ دو دنوں کے دوران دونوں رہنما کس قدر ایک دوسرے کے قریب آئے ہیں۔ ان کا کہنا تھا کہ “استقبالیہ تقاریب سے لے کر تحائف کے تبادلے، دعوتوں اور ثقافتی پرفارمنسز تک کے دوران دونوں صدور کو ایسے کئی مواقع ملے جن میں انہیں ایک دوسرے کو اچھی طرح جاننے اور ذاتی کیمسٹری بنانے کا موقع ملا۔”
یہ بھی پڑھیں: ایکس سے کے متبادل مائکرو بلاگنگ پلیٹ فارم بلو اسکائی نےنیا سنگ میل عبور کر لیا
یہ واقعہ نہ صرف مزاحیہ مکالمے کی وجہ سے توجہ کا مرکز بنا بلکہ دونوں ممالک کے درمیان تعلقات میں نرمی اور اعتماد کے مظاہرے کے طور پر بھی دیکھا جا رہا ہے۔
