اسلام آباد: (کشمیر ڈیجیٹل) شہریوں کے لیے ایک بڑی خوشخبری سامنے آئی ہے، نادرا نے نکاح کے آن لائن اندراج کی زبردست سہولت متعارف کروا دی ہے۔ اس نئی سروس کے ذریعے اب شہری اپنے نکاح کا اندراج براہِ راست پاک آئی ڈی (Pak ID) موبائل ایپ کے ذریعے متعلقہ یونین کونسل میں کروا سکیں گے۔
نادرا کے مطابق یہ اقدام شہریوں کو نکاح کے سرٹیفیکیٹس حاصل کرنے میں آسانی فراہم کرنے اور اس عمل کو زیادہ تیز، شفاف اور سہل بنانے کے لیے اٹھایا گیا ہے۔ اس سہولت کے ذریعے شہری نہ صرف نکاح کا اندراج آن لائن کر سکیں گے بلکہ بعد میں میریج رجسٹریشن سرٹیفیکیٹ کو بھی اسی موبائل ایپ کے “آئی ڈی والٹ” میں ڈاؤن لوڈ کر کے استعمال کر سکیں گے۔
ابتدائی مرحلے میں یہ سہولت تین اضلاع میں فراہم کی جا رہی ہے ، چکوال کی 71 یونین کونسلز، جہلم کی 44 یونین کونسلز، اور ننکانہ صاحب کی 65 یونین کونسلز میں۔ نادرا نے عندیہ دیا ہے کہ جلد یہ سہولت مرحلہ وار پورے پاکستان میں دستیاب ہوگی تاکہ شہری بغیر کسی کاغذی کارروائی یا دور دراز کے چکروں کے اپنے نکاح کا اندراج آسانی سے کر سکیں۔
یہ اقدام نادرا کی پہلے سے جاری آن لائن خدمات کے تسلسل کا حصہ ہے، جن میں پیدائش اور وفات کے سرٹیفیکیٹس کے اندراج کی سہولت بھی شامل ہے۔ اب شہری یونین کونسل کے چکر لگائے بغیر گھر بیٹھے بچوں کی پیدائش یا کسی وفات کا اندراج بھی بآسانی کر سکتے ہیں۔ فی الحال یہ سہولت بھی چکوال، جہلم اور ننکانہ صاحب میں فعال ہے، تاہم آئندہ دنوں میں دیگر اضلاع تک اس کا دائرہ کار بڑھایا جائے گا۔
یہ بھی پڑھیں: نادرا کا شہریوں کو پہلا شناختی کارڈ مفت فراہم کرنے کا اعلان
نادرا کے اس آن لائن نظام سے شہریوں کا قیمتی وقت اور محنت دونوں بچیں گے، ساتھ ہی سرکاری عملے پر بوجھ میں بھی کمی آئے گی۔ اس سہولت سے شہری فوری، محفوظ اور قانونی طریقے سے سرکاری دستاویزات حاصل کر سکیں گے، جو ان کے مختلف انتظامی اور قانونی امور میں آسانی پیدا کرے گا۔
یہ بھی پڑھیں:سی پیک نے گلگت بلتستان کے لیے ترقی اور خوشحالی کے نئے دروازے کھول دیے، صدر آصف علی زرداری
نادرا کی یہ جدید ڈیجیٹل سروس ڈیجیٹل پاکستان ویژن کے تحت عوام کے لیے سہولت، شفافیت اور کارکردگی میں بہتری کی جانب ایک اہم قدم ہے۔ یہ اقدام نہ صرف نادرا کی خدمات میں جدت کا مظہر ہے بلکہ پاکستان کے سرکاری نظام کو مکمل طور پر ڈیجیٹل بنانے کے سفر میں ایک نمایاں پیشرفت بھی قرار دی جا رہی ہے۔
