ضلع حویلی فارورڈ کہوٹہ میں کم عمر بچوں کو والدین کی جانب سے موٹر سائیکل چلانے کی اجازت دینے کے واقعات میں تیزی سے اضافہ ہو رہا ہے۔ 18 سال سے کم عمر ایسے بچے جن کے ڈرائیونگ لائسنس نہیں بنے ہوتے، سڑکوں پر خطرناک انداز میں بائیک چلانے سے حادثات کے خدشات بڑھ گئے ہیں۔
ٹریفک پولیس کے مطابق، والدین کی غفلت کے باعث کئی واقعات پیش آچکے ہیں۔ انتظامیہ نے والدین کو واضح پیغام دیا ہے کہ وہ بچوں کو کم عمری میں موٹر سائیکل چلانے سے روکیں، بصورت دیگر قانونی کارروائی کی جائے گی۔
ٹریفک پولیس حکام نے بتایا کہ “ہم نے خصوصی مہم شروع کر دی ہے، جس کے تحت 18 سال سے کم عمر بچوں سے موٹر سائیکل ضبط کی جا رہی ہے اور والدین کے خلاف چالان بھی کیا جا رہا ہے۔” حکام نے کہا کہ والدین ہوشیار ہو جائیں اور بچوں کو ٹریفک قوانین کی پابندی سکھائیں تاکہ حادثات کی روک تھام ممکن ہو سکے۔
شہریوں نے بھی والدین سے اپیل کی ہے کہ وہ اپنے بچوں کو کم عمری میں موٹر سائیکل چلانے کی اجازت نہ دیں۔ ان کا کہنا ہے کہ ایسا قدم نہ صرف بچوں کی حفاظت کے لیے ضروری ہے بلکہ معاشرتی ذمہ داری بھی ہے۔
یہ بھی پڑھیں: ہونڈا سی جی 125 خریدنے کے خواہشمندوں کیلئے بڑی خوشخبری، نیا پلان متعارف
ماہرین کے مطابق، والدین اگر سختی سے ٹریفک قوانین پر عمل کروائیں تو حادثات میں نمایاں کمی آ سکتی ہے۔ عوامی سطح پر بھی آگاہی مہمات کی ضرورت ہے تاکہ ہر شہری اپنی ذمہ داری کو سمجھے اور عمل کرے۔
