کوالالمپور: وزیراعظم پاکستان محمد شہباز شریف دو روزہ سرکاری دورے پر ملائیشیا پہنچ گئے، جہاں ان کے اعزاز میں شاندار استقبال کیا گیا ۔
وزیراعظم شہباز شریف بنگا رایا بین الاقوامی ہوائی اڈے پر پہنچے تو ملائیشیا کے وزیر اطلاعات و کمیونیکیشنز فہمی فاضل، پاکستان کے ہائی کمشنر سید احسن رضا شاہ اور سفارتی عملے نے ان کا پُرتپاک استقبال کیا ۔
کوالالمپور کی شاہراہیں پاکستان اور ملائیشیا کے پرچموں سے سجی ہوئی تھیں۔ وزیراعظم شہباز شریف اپنے ملائیشیائی ہم منصب انور ابراہیم کی دعوت پر سرکاری دورے پر کوالالمپورپہنچے ہیں ۔
وزیراعظم کی رہائش گاہ پر آمد کے موقع پر ملائیشیا کے وزیراعظم انور ابراہیم نے شہباز شریف کا گرمجوشی سے استقبال کیا اور خوش آمدید کہا ۔ شہباز شریف نے شاندار میزبانی پر شکریہ ادا کرتے ہوئے کہا کہ انہیں ملائیشیا آ کر بے حد خوشی محسوس ہو رہی ہے، اور یہ دورہ دونوں برادر ممالک کے تعلقات کو مزید مضبوط بنانے کا باعث بنے گا ۔
مزید یہ بھی پڑھیں:سیلاب متاثرین کی بحالی تک چین سے نہیں بیٹھوں گا : وزیراعظم شہباز شریف
وزیراعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی بھی موجود ہیں ۔
دورے کے دوران وزیراعظم شہباز شریف کی ملائیشیا کے وزیراعظم انور ابراہیم سے ملاقات ہو گی جبکہ وفود کی سطح پر مذاکرات بھی متوقع ہیں ۔
اس موقع پر دونوں ممالک کے درمیان تعاون بڑھانے کے لیے مختلف شعبوں میں معاہدوں اور مفاہمتی یادداشتوں پر دستخط کیے جائیں گے ۔
توقع ہے کہ دونوں رہنما تجارت، آئی ٹی اور ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت سمیت مختلف شعبوں میں تعاون کے فروغ پر غور کریں گے ۔
وزیراعظم شہباز شریف کا یہ دورہ پاکستان اور ملائیشیا کے تعلقات کو مزید مستحکم اور وسعت دینے کے حوالے سے انتہائی اہم قرار دیا جا رہا ہے ۔
