اسلام آباد: وزیراعظم شہباز شریف نے آزاد کشمیر میں مذاکراتی عمل کی کامیابی کا خیر مقدم کرتے ہوئے کہا ہے کہ سازشیں اور افواہیں آخر کار دم توڑ گئیں۔
وزیراعظم نے مذاکراتی کمیٹی کے ارکان کو خراج تحسین پیش کرتے ہوئے کہا کہ امن کا قیام اور حالات کا معمول پر آنا خوش آئند ہے۔ ان کا کہنا تھا کہ سازشیں اور افواہیں آخرکار دم توڑ گئیں، تمام معاملات خوش اسلوبی سے حل ہوئے، حکومت کشمیری بھائیوں کے مسائل حل کرنے کے لیے ہر وقت تیار ہے۔
شہباز شریف نے مزید کہا کہ عوامی مفاد اور امن ترجیح ہے، آزاد کشمیر کی خدمت کرتے رہیں گے، کشمیری بھائیوں سے گزارش ہے کہ افواہوں پر کان دھرنے سے گریز کریں۔ انہوں نے کہا کہ پہلے بھی کشمیری بہن بھائیوں کے حقوق کے محافظ تھے اور آئندہ بھی رہیں گے۔
یاد رہے کہ آزاد کشمیر میں عوامی ایکشن کمیٹی کے احتجاج پر وزیراعظم شہباز شریف نے مذاکراتی کمیٹی تشکیل دی تھی جس نے عوامی ایکشن کمیٹی کے اراکین سے مذاکرات کے کئی سیشن کیے اور بالآخر رات گئے فریقین کے درمیان تحریری معاہدہ طے پایا۔
یہ بھی پڑھیں: سری نگر میں سید علی گیلانی کا گھر بھارتی انتظامیہ نے ضبط کر لیا
وفاقی وزیر احسن اقبال نے عوامی ایکشن کمیٹی سے طے پانے والے مذاکرات کو آزاد کشمیر، پاکستان اور جمہوریت کی فتح قرار دیا۔ عوامی ایکشن کمیٹی نے معاملات کے حل کے لیے خصوصی دلچسپی لینے پر وزیراعظم شہباز شریف اور فیلڈ مارشل عاصم منیر کا شکریہ ادا کرتے ہوئے کہا کہ یہ ہمارا اندرونی معاملہ ہے جسے ہم نے بہترین طریقے سے حل کیا، کسی دوسرے ملک کو اپنے معاملات میں مداخلت کی اجازت نہیں دیں گے۔
