نیویارک (کشمیر ڈیجیٹل) اقوام متحدہ کے سیکرٹری جنرل انتونیو گوتریس نے کہا ہے کہ الگ اور آزاد ریاست کا قیام فلسطینی عوام کا بنیادی حق ہے جسے کسی صورت نظر انداز نہیں کیا جا سکتا۔
فلسطین کانفرنس سے خطاب کرتے ہوئے گوتریس نے کہا کہ فلسطینی ریاست کا قیام کوئی انعام نہیں بلکہ ایک مسلمہ حق ہے، اور اس حق سے انکار انتہا پسندوں کے لیے تحفہ دینے کے مترادف ہوگا۔ انہوں نے ایک بار پھر دو ریاستی حل کی بھرپور حمایت کرتے ہوئے کہا کہ یہی واحد راستہ ہے کہ دو خود مختار اور آزاد ریاستیں ایک دوسرے کو تسلیم کریں اور عالمی برادری کا حصہ بنیں۔
سیکرٹری جنرل نے مغربی کنارے میں اسرائیلی بستیوں کی توسیع کو ناقابل جواز قرار دیتے ہوئے فوری طور پر اس عمل کو روکنے کا مطالبہ کیا۔ ان کا کہنا تھا کہ بستیوں کی توسیع امن کی باقی امیدوں کو ختم کر رہی ہے اور اس کے لیے کوئی جواز پیش نہیں کیا جا سکتا۔
انتونیو گوتریس نے جنگ بندی کے مطالبے کو دہراتے ہوئے کہا کہ الحاق کے خطرات اور آبادکاروں کے بڑھتے ہوئے تشدد کو فوری طور پر روکا جانا چاہیے تاکہ خطے میں امن قائم ہو سکے۔
یہ بھی پڑھیں: برطانوی پاسپورٹ ہولڈرز کے لیے اہم ہدایت،سفر کے دوران رکھیں بیک اپ پلان
یاد رہے کہ فلسطین کانفرنس کی صدارت فرانسیسی صدر ایمانوئیل میکرون اور سعودی وزیر خارجہ فیصل بن فرحان کر رہے ہیں، جبکہ اس دوران فرانسیسی صدر نے فلسطین کو ایک خود مختار ریاست تسلیم کرنے کا اعلان بھی کیا۔
