ایشیا کپ ٹی 20 ٹورنامنٹ 2025 کے چھٹے میچ میں بھارت کیخلاف پاکستان کی بیٹنگ لائن بُری طرح لڑکھڑا گئی ، ٹاپ آرڈر مکمل طور پر ناکام، بھارت کو جیت کیلئے صرف 128 رنز کا ہدف دیا ہے ۔
ایشیا کپ ٹی ٹوئنٹی ٹورنامنٹ میں گروپ اے کا ہائی وولٹیج میچ دبئی میں کھیلا جارہا ہے جہاں پاکستان نے روایتی حریف بھارت کے خلاف ٹاس جیت کر پہلے بیٹنگ کا فیصلہ کیاتھا ۔
پاکستان کی ٹیم نے پہلے کھیلتے ہوئے مقرر 20 اوورز میں 9 وکٹ کے نقصان پر 127 رنزبنائے ۔
بھارت کے خلاف پاکستان کی پہلی وکٹ پہلی ہی گیند پر گرگئی جب صائم ایوب پانڈیا کی گیند پر بغیر کوئی رن بنائے پویلین لوٹ گئے ۔
پاکستان کے دوسرے آؤٹ ہونے والے کھلاڑی محمد حارث تھے جو 6 کے مجموعی اسکور پر 3 رنز بنا کر بمراہ کو وکٹ دے بیٹھے ۔
45 کے مجموعی اسکور پر فخر زمان 17 رنز بنا کرچلتے بنے، انہیں اکشر پٹیل نے آؤٹ کیا ۔ ان کے بعد پاکستانی کپتان سلمان آغا بھی 3 رنز بنا کر اکشر پٹیل کے ہاتھوں آؤٹ ہوگئے ۔
سلمان آغا کے بعد آنے والے بلے باز حسن نواز بھی64 کے مجموعی اسکور پر 5 رنز بنا کرکریز چھوڑ گئے، انہیں کلدیپ یادیو نے بولڈ کیا۔ ان کے بعد حسن نواز بھی پہلی ہی گیند پر کلدیپ یادیو کانشانہ بن گئے ۔
83 رنز پر صاحبزادہ فرحان بھی ہمت ہار گئے اور کلدیپ یادیو کو وکٹ دے گئے، انہوں نے 44 گیندوں پر 40 رنز بنائے ۔ پاکستان کی8ویں وکٹ 97 رنز پر گری جب فہیم اشرف 11 رنز بنا کر آؤٹ ہوئے ۔
بھارت کے خلاف پاکستان کی نویں وکٹ 111 رنز پر گری ، سفیان مقیم 10رنز بنا کر آؤٹ ہوئے ۔
آج کے میچ کے لیے پاکستان ٹیم میں کوئی تبدیلی نہیں کی گئی، پاکستان ٹیم ان ہی 11 کھلاڑیوں کے ساتھ میدان میں اتری ہے جنہوں نے عمان کے خلاف پاکستان کو 93 رنز سے فتح دلوائی تھی ۔
پاکستان ٹیم میں کپتان سلمان علی آغا ، صاحبزادہ فرحان ، صائم ایوب ، محمد حارث، فخرزمان ، حسن نواز، محمد نواز ، فہیم اشرف ، شاہین شاہ آفریدی ، سفیان مقیم اور ابرار احمد شامل ہیں ۔
بھارتی ٹیم میں ابھیشک شرما، شبھمن گل ، سنجو سیمسن ،کپتان سوریا کمار یادیو ، تلک ورما ، شیوم دوبے ، ہاردیک پانڈیا ، اکشر پٹیل ، کلدیپ یادیو ، جسپریت بھمرا اور ورن چکرورتی بھی بھارتی ٹیم میں شامل ہیں ۔
6 ماہ کے دوران دونوں ٹیمیں دوسری بار آمنے سامنے ہیں ، اس سے قبل پاکستان اور بھارت کی ٹیمیں چیمپئنز ٹرافی کے میچ میں آمنے سامنے آئی تھیں ۔
حالیہ کارکردگی کے لحاظ سے دونوں ٹیمیں بہترین فارم میں ہیں ۔ بھارت نے ایشیا کپ میں متحدہ عرب امارات کے خلاف 9 وکٹوں سے فتح حاصل کی جبکہ پاکستان نے افغانستان اور یو اے ای کو شکست دے کر سہ ملکی سیریز اپنے نام کی ۔
ایشیا کپ میں دونوں ٹیموں کا ریکارڈ بھی دلچسپ ہے ۔
بھارت نے اب تک 19 میچوں میں سے 10 میں کامیابی حاصل کی جبکہ پاکستان نے 6 جیتے ہیں ۔ پاکستان کی بھارت کے خلاف ایشیا کپ میں آخری فتح 2022 میں سمیٹی تھی ۔
بھارت 8 بار ایشیا کپ کا چیمپئن بن چکا ہے جبکہ پاکستان نے یہ اعزاز صرف 2 مرتبہ حاصل کیا ہے ۔
