(کشمیر ڈیجیٹل) فیلڈ مارشل سید عاصم منیر(ہلال جرات اور نشان امتیاز ،ملٹری) نے خیبر پختونخوا میں سیلاب سے متاثرہ عوام کی بحالی کے لیے خصوصی ہدایات جاری کر دی ہیں۔
سیکیورٹی ذرائع کے مطابق، آرمی چیف کا کہنا ہےکہ خیبر پختونخوا میں تعینات فوج سیلاب سے متاثرہ عوام کی بحالی میں بھرپور مدد کرے گی۔ امدادی کارروائیوں کے لیے اضافی فوجی دستے بھی بھیجے جا رہے ہیں۔
پاک فوج نے متاثرہ عوام کے لیے ایک دن کی تنخواہ وقف کر دی ہے جبکہ اپنا ایک دن کا راشن، جو تقریباً 600 ٹن سے زائد بنتا ہے، بھی امداد کے لیے مختص کر دیا گیا ہے۔ کور آف انجینئرز کو خصوصی ہدایات جاری کی گئی ہیں کہ پلوں کی مرمت کا کام جلد مکمل کیا جائے اور جہاں ضروری ہو عارضی پل قائم کیے جائیں۔
ریسکیو آپریشنز میں مدد کے لیے آرمی کے نائن یونٹ کے ریسکیو سنِفنگ ڈاگ یونٹ اور خصوصی اربن سرچ اینڈ ریسکیو ٹیم بھی تعینات کر دی گئی ہیں۔ مزید برآں، پاک فوج کے ہیلی کاپٹر اور آرمی ایوی ایشن پہلے ہی خیبر پختونخوا کے سیلاب متاثرین کی بحالی کے لیے سرگرم ہیں۔
یہ بھی پڑھیں: حکومت نے پیٹرول کی قیمت برقرار رکھی، ڈیزل کی قیمت میں کمی کر دی
سیکیورٹی ذرائع کے مطابق، پاک فوج مشکل کی ہر گھڑی میں خیبر پختونخوا کے عوام کے ساتھ کندھے سے کندھا ملا کر کھڑی ہے۔
