(کشمیر ڈیجیٹل) امریکی وزیر خزانہ سکاٹ بیسنٹ نے بھارت پر شدید تنقید کرتے ہوئے کہا ہے کہ بھارت امریکا کے ساتھ تجارتی مذاکرات میں مسلسل ہٹ دھرمی کا مظاہرہ کر رہا ہے۔
غیر ملکی میڈیا کو دیے گئے انٹرویو میں سکاٹ بیسنٹ کا کہنا تھا کہ سوئٹزرلینڈ اور بھارت سمیت متعدد ممالک کے ساتھ تجارتی معاہدے ابھی تک مکمل نہیں ہو سکے، امید ہے کہ ٹرمپ انتظامیہ اکتوبر کے آخر تک مذاکرات کو حتمی شکل دے گی، تاہم بھارت کا رویہ اس عمل میں بڑی رکاوٹ ہے۔
انہوں نے مزید بتایا کہ امریکی حکام آئندہ دو سے تین ماہ میں چینی حکام سے ملاقات کریں گے، جس میں دونوں ممالک کے درمیان معاشی تعلقات کے مستقبل پر تبادلہ خیال کیا جائے گا۔
ادھر امریکی محکمہ خارجہ کی ترجمان ٹیمی بروس نے کہا کہ پاکستان اور بھارت کے درمیان حالیہ کشیدگی کے دوران صورتحال بگڑ سکتی تھی، مگر امریکی قیادت کی بروقت کوششوں سے ممکنہ تباہی کو ٹال دیا گیا۔ ان کے مطابق امریکا کے دونوں ممالک کے ساتھ تعلقات مضبوط ہیں اور خطے میں امن کے قیام کے لیے تعاون جاری رکھا جائے گا۔
یہ بھی پڑھیں: اسلام آباد میں جشنِ آزادی پر خصوصی ٹریفک پلان کا اعلان
واضح رہے کہ امریکی صدر ڈونلڈ ٹرمپ نے بھارت پر مزید 25 فیصد ٹیرف عائد کیا ہے، جس کے بعد مجموعی امریکی ٹیرف 50 فیصد تک پہنچ گیا ہے۔
