(کشمیر ڈیجیٹل)وفاقی حکومت نے ہر شہری کو ڈیجیٹل ڈیوائسز تک آسان رسائی فراہم کرنے کے لیے اسمارٹ فونز کی فراہمی ایک نئی پالیسی کے تحت آسان اقساط پر کرنے کا عندیہ دے دیا ہے۔ اس اقدام کا مقصد عوام کو ڈیجیٹل ٹیکنالوجی سے ہم آہنگ کرنا اور نوجوانوں کو جدید تعلیم و تربیت کے مواقع فراہم کرنا ہے۔
وفاقی وزیر شزا فاطمہ نے ایک تقریب سے خطاب کرتے ہوئے کہا کہ ٹیکنالوجی علم تک رسائی کو عام کر سکتی ہے اور یہ نوجوان نسل، خصوصاً خواتین طلبہ کے لیے سائنس اور ٹیکنالوجی کے میدان میں نئے کیریئر کی راہیں ہموار کرے گی۔ اُنہوں نے واضح کیا کہ سائنس، ٹیکنالوجی، انجینئرنگ اور ریاضی (ایس ٹی ای ایم) کے فروغ کا مقصد حکومت کے وسیع ڈیجیٹل وژن کو عملی جامہ پہنانا ہے۔
انہوں نے بتایا کہ حکومت اسمارٹ فونز کی فراہمی کیلئے نئی پالیسی مرتب کر رہی ہے، تاکہ ہر فرد کو ڈیجیٹل سہولیات تک باآسانی رسائی حاصل ہو۔ اس ضمن میں “ڈی جی اسکلز پروگرام” کے تحت گزشتہ سال ایک لاکھ نوجوانوں کو تربیت دی گئی، جب کہ رواں برس دس لاکھ بچوں کو مصنوعی ذہانت (اے آئی) میں تربیت دینے کا ہدف رکھا گیا ہے۔
یہ بھی پڑھیں: امریکی ویزے کے خواہشمندوں سے 15 ہزار ڈالر زرضمانت لینے کی تجویز
تقریب سے خطاب کرتے ہوئے وزیر مملکت برائے وفاقی تعلیم و پیشہ ورانہ تربیت وجیہہ قمر نے بھی ایس ٹی ای ایم فیڈ کے آغاز کو خوش آئند قرار دیا۔ اُن کا کہنا تھا کہ یہ اقدام پاکستان کے نوجوانوں کے لیے سائنس اور ٹیکنالوجی کو زیادہ دلچسپ اور قابل رسائی بنانے کی طرف ایک مثبت پیش رفت ہے۔
