(کشمیر ڈیجیٹل)پاکستان نے ویسٹ انڈیز کو فیصلہ کن ٹی ٹوئنٹی میچ میں 13 رنز سے شکست دے کر تین میچوں کی سیریز 1-2 سے اپنے نام کر لی۔
یہ میچ امریکی ریاست فلوریڈا کے شہر لاؤڈر ہل میں کھیلا گیا جہاں پاکستان کے کپتان سلمان علی آغا نے ٹاس جیت کر پہلے بیٹنگ کا فیصلہ کیا۔ قومی ٹیم نے پہلے کھیلتے ہوئے 4 وکٹوں کے نقصان پر 189 رنز بنائے۔
پاکستان کی جانب سے اوپنرز صائم ایوب اور صاحبزادہ فرحان نے شاندار بیٹنگ کا مظاہرہ کیا۔ صائم ایوب نے 66 رنز اسکور کیے جبکہ صاحبزادہ فرحان 74 رنز بنا کر نمایاں رہے۔ حسن نواز 15 اور محمد حارث 2 رنز پر پویلین لوٹے، جبکہ خوشدل شاہ 11 اور فہیم اشرف 10 رنز کے ساتھ ناٹ آؤٹ رہے۔
ویسٹ انڈیز کی جانب سے جیسن ہولڈر، روسٹن چیز اور شمار جوزف نے ایک ایک وکٹ حاصل کی۔
جواب میں ویسٹ انڈیز کی ٹیم مقررہ 20 اوورز میں 6 وکٹوں کے نقصان پر 176 رنز بنا سکی اور یوں پاکستان نے میچ 14 رنز سے جیت لیا۔
تیسرے ٹی ٹوئنٹی کے لیے پاکستان ٹیم میں دو تبدیلیاں کی گئیں۔ شاہین شاہ آفریدی کی جگہ حارث رؤف اور فخر زمان کی جگہ خوشدل شاہ کو ٹیم میں شامل کیا گیا۔
یہ بھی پڑھیں: روزمرہ غذا میں بھنڈی شامل کریں، بیماریوں سے قدرتی تحفظ پائیں
خیال رہے کہ سیریز کے پہلے میچ میں پاکستان نے فتح حاصل کی تھی جبکہ دوسرا میچ ویسٹ انڈیز کے نام رہا تھا۔
