بمبئی (کشمیر ڈیجیٹل) ہندوستانی فوج کی طرف سے کئے گئے ’آپریشن سندور‘ سے متعلق بھارت کیخلاف خبریں چلانے والے 1400بھارتی ڈیجیٹل میڈیا کو مودی حکومت نے بلاک کردیا ۔
مودی حکومت کی جانب سے الزام عائد کیا گیا ہے کہ آپریشن سندور کو ناکام بنانے میں بھارت کے اندر چلنے والے ڈیجیٹل میڈیا نے پاکستانی بیانئے کو فروغ دے کر بھارت کو نقصان پہنچایا۔ ۔
لوک سبھا میں آپریشن سندور سے متعلق پوچھے گئے ایک سوال کے جواب میں مرکزی وزیر برائے اطلاعات و نشریات اشونی ویشنو نےکہا کہ بھارت میں فرضی خبروں پر قابو کرنے کیلئے حکومت نے اصول و ضوابط تیار کرلئے ہیں۔
آپریشن سندور کے دوران ہندوستان کے باہر سے فوج کے بارے میں کئی طرح کی فرضی خبریں پھیلانے کی کوشش کی گئی اور اسے روکنے کے لیے حکومت کی طرف سے سخت قدم اٹھایا گیا۔
بھارتی حکومت کی طرف سے اطلاعاتی تکنیک قانون 2000 کی دفعہ 69 اے کے تحت فرضی خبر پھیلانے والے ویب سائٹس اور سوشل میڈیا ہینڈل پر روک لگانے کا حکم جاری کردیا گیا ہے ۔
نتیجۂ کار آپریشن سندور کے دوران ایسے تقریباً 1400 سوشل میڈیا سائٹس کو بلاک کیا گیا۔ اتنا ہی نہیں، مرکزی حکومت کی ’فیکٹ چیک یونٹ‘ نے ہندوستان اور ہندوستانی فوج کے خلاف پاکستان کی غلط تشہیر کا دلیلوں کے ساتھ مقابلہ کیا۔
بھارتی وزیراطلاعات کے مطابق آپریشن سندور کے دوران بھارت کے اندر پاکستان کے پروپیگنڈہ سے نمٹنے کیلئے ایک سنٹرلائز کنٹرول روم بنایا گیا تھا تاکہ مختلف محکموں اور وزارتوں کے درمیان بہتر کوآرڈنیشن بنایا جا سکے۔
یہ کنٹرول روم 24 گھنٹے کام کر رہا تھا اور صحیح خبر کی جانکاری سبھی میڈیا گروپوں کو مہیا کرانے کا کام کر رہا تھا۔ کنٹرول روم میں برّی، بحری اور فضائی افواج کے نوڈل افسران کے علاوہ حکومت کے مختلف محکموں کے میڈیا افسران، پریس انفارمیشن کمیشن کے افسران شامل تھے۔
آپریشن سندور سے متعلق سوشل میڈیا پر موجود فرضی خبروں پر نظر رکھی جا رہی تھی اور پھر مناسب کارروائی کا حکم دیا جا رہا تھا۔
