اسلام آباد: آزاد کشمیر میں کمپیوٹرائزڈ الیکٹو رل رول سسٹم کی تیاری کے حوالہ سے آزاد جموں وکشمیر الیکشن کمیشن اور انفارمیشن ٹیکنالوجی بورڈ کا نادرا کے ساتھ معاہدہ طے پا گیا۔
معاہدہ پر دستخطوں کی تقریب نادرا ہیڈ کوارٹرز اسلام آباد میں منعقد ہوئی۔ معاہدے پر آزاد کشمیر الیکشن کمیشن کی جانب سے سیکرٹری راجہ محمد شکیل خان ،سیکرٹری انفارمیشن ٹیکنالوجی راشد حنیف اور چیف پراجیکٹ آفیسر نادرا رحمان قمر نے دستخط کئے۔
اس موقع پر ممبر الیکشن کمیشن سید نظیر الحسن گیلانی اور چیئرمین نادرا لیفٹیننٹ جنرل محمد منیر افسربھی موجود تھے ۔
معاہدے کے تحت نادرا آزاد جموں وکشمیر الیکشن کمیشن کو کمپیوٹرائزڈ الیکٹو رل رول سسٹم تیار کر کے دینے کے علاوہ کمیشن کے 10ضلعی اور4 دیگر دفاتر میں اس سسٹم کی تنصیب بھی عمل میں لائے گا ۔
نادرا کمیشن کوسافٹ ویئر اور ہارڈ ویئربھی فراہم کریگااوراس جدید ترین ٹیکنالوجی کے استعمال کے لئے آزاد جموں وکشمیر الیکشن کمیشن کے متعلقہ عملہ کی استعداد کار بڑھانے کے لئے ان کی ضروری تربیت کے اہتمام کے علاوہ اس سسٹم کو مکمل طور پر فعال رکھنے کے لئے کمیشن کی ہر طرح کی تکنیکی اور فنی معاونت بھی کرے گا۔
یہ بھی پڑھیں: چیف الیکشن کمشنر آزاد کشمیر کے لیے چار ناموں پر مشتمل پینل وزیراعظم پاکستان کو بھجوا دیا گیا
آزاد کشمیر الیکشن کمیشن کے مرکزی اور ضلعی دفاتر میں اس سسٹم کی تنصیب کے بعد انتخابی فہرستوں کی تیاری اوران میں ووٹوں کے اندراج ،اخراج ،تبدیلی اور درستگی وغیرہ سے متعلقہ جملہ امور اور حلقہ بندیوں کی تحدیدو تشکیل سے متعلقہ تمام تر معاملات جدید ترین انفارمیشن ٹیکنالوجی کی مد د سے انجام پذیر ہونا شروع ہو جائیں گے۔
آزاد جموں وکشمیر الیکشن کمیشن میں کمپیوٹرائزڈ الیکٹو رل رول سسٹم کا استعمال آئندہ ہونے والے عام انتخابات اور لوکل باڈیز کے انتخابات کو صاف و شفاف بنانے اور انتخابی عمل پررائے دہندگان کا اعتماد بڑھانے کی جانب ایک انقلابی قدم ہو گا۔
قبل ازیں ممبر الیکشن کمیشن سید نظیر الحسن گیلانی چیئرمین نادرالیفٹیننٹ جنرل محمد منیر افسر سےملاقات کی جس میں چیئرمین نادرا نے انہیں بھرپورتعاون کی یقین دہانی کرائی۔
یہ بھی پڑھیں: کسی کی خواہش پر ہم الیکشن وحلقہ کی سیٹ سے دستبردارنہیں ہوسکتے ،قاسم مجید
ممبر الیکشن کمیشن نے چیئرمین نادرا سے انتخابی عمل کی شفافیت کے لئے مہاجرین مقیم پاکستان کے قومی شناختی کارڈز میں ان کی کشمیر ی شناخت کے اندراج ،انتخابی فہرستوں کی طباعت کے معاوضوں میں کمی ،دونوں اداروں کے درمیان ایک مشترکہ ورکنگ گروپ کے قیام پر تبادلہ خیال کیا گیا۔
آزاد کشمیر الیکشن کمیشن کے ریکارڈ کے تحفظ اور کمیشن کی جانب سے پولنگ اسکیمز کے اجرا ء میں جدید انفارمیشن ٹیکنالوجی کے استعمال کے لئے نادرا کی معاونت اور اس ضمن میں کمیشن کے متعلقہ عملہ کی ضروری تربیت وغیرہ سے متعلقہ مختلف تجاویز پر بھی تفصیلی تبادلہ خیال کیا ۔
چیئرمین نادرا نے آزاد جموں وکشمیر میں آزادانہ ،منصفانہ اور غیر جانبدارانہ انتخابات کے انعقاد کے لئےالیکشن کمیشن کے عز م کو سراہتے ہوئے اس ضمن میں اپنے ادارے کے بھر پور تعاون کا یقین دلایا۔
