نئی دلی/سرینگر: غیر قانونی طور پر تہاڑ جیل میں قید کل جماعتی حریت کانفرنس کے سینئر رہنما شبیر احمد شاہ کی بیٹی سحر شبیر نے کہا ہے کہ والد کی صحت ہر گزرتے دن کے ساتھ تیزی سے گر رہی ہے۔
سحر شبیر نے جمعرات کے روز اپنی بڑی بہن کے ہمراہ تہاڑ جیل میں اپنے والد سے ملاقات کی جس کے بعد سحر شاہ نے اپنے فیس بک اکائونٹ پر درد بھری پوسٹ کی ہے۔
سحر شاہ کا کہنا تھا کہ جیل میں شبیر شاہ کی صحت تیزی سے گر رہی ہے ۔ ان کا رنگ زردہے اور وہ بہت لاغر اورکمزو ر لگ رہے تھے ۔
انہوں نے بتایاکہ شبیر شاہ غیر متزلزل عزم اور حوصلے کے مالک ہیں انہوں نے دہائیوں تک قید کو ثابت قدمی سے برداشت کیا ہے تاہم آج ان کی حالت ابتر تھی۔
سحر شاہ نے کہاکہ ابھی چند دن قبل تہاڑ جیل کے عملے نے عوامی نوٹس جاری کیا تھاجس میں ہمارے خدشات کی تردید کرتے ہوئے کہاگیاتھاکہ شبیر شاہ جیل میں مکمل طورپرصحت مند ہیںتاہم انہوں نے کہاکہ وہ پوری ذمہ داری کے ساتھ کہتی ہیں کہ ان کا یہ دعویٰ بالکل درست نہیں تھا ۔
یہ بھی پڑھیں: والد کا علاج کرایا جائے اس سے قبل کہ دیر ہو جائے ،سحر شبیر شاہ کی جذباتی اپیل
سحر شبیر کا کہنا تھا کہ شبیر شاہ کو صفدر جنگ ہسپتال لے جایا گیا تھا،جہاں ڈاکٹروں نے انہیں بتایا تھا کہ وہ کینسر کے مرض میں مبتلا ہیں تاہم االحمدللہ، ان کا کینسر کا ٹیسٹ منفی آیاہے۔
انہوں نے کہاکہ شبیر شاہ دل کے عارضے کے علاوہ ذیابیطس ، پروسٹیٹ انفیکشن اور گھٹنے کے مسائل میں مبتلا ہیں اور انہیں فوری سرجری کی ضرورت ہےتاہم انہیں علاج معالجے کی مناسب سہولت فراہم نہیں کی جارہی ہے ۔
سحر شبیر نے کہاکہ شبیر شاہ جیل میں چلنے پھرنے سے بھی قاصر ہیں،اگرچہ ان پر عدالت کی طرف سے کبھی فرد جرم عائد نہیں کی گئی ہے تاہم ان کے جذبہ حریت اورعزم و ہمت کو کمزور کرنے کیلئے دانستہ طورپر انکے خلاف درج جھوٹے مقدمات کی سماعت میں تاخیر کی جارہی ہے ۔
انہوں نے عالمی برادری اور انسانی حقوق کی بین الاقوامی تنظیموں سے اپیل کی کہ وہ انکے والد شبیر احمد شاہ اور دیگر غیر قانونی طور پر نظر بند حریت رہنمائوں اور کارکنوں کی رہائی کیلئے بھارت پر دبائو بڑھائیں۔
یاد رہے کہ اس سے قبل سحر شاہ نے ویڈیو پیغام کے ذریعے بھی عالمی برادری سے نوٹس لینے کی اپیل کی تھی۔
