مظفرآ باد(کشمیر ڈیجیٹل)ایڈیشنل چیف سیکرٹری (ترقیات)عاطف الرحمان کی زیر صدارت آزاد کشمیر ترقیاتی ورکنگ پارٹی کا مالی سال 2025-26ء کا پہلا اجلاس کشمیر پلان ہا ئوس مظفرآباد میں منعقد ہوا۔
اجلاس میں پلاننگ کمیشن پاکستان، محکمہ مالیات کے نمائندگان کے علاوہ متعلقہ محکمہ جات کے سیکرٹری صاحبان و محکمہ منصوبہ بندی و ترقیات کے آفیسران نے شرکت کی۔
اجلاس میں محکمہ جنگلات کے زیر انتظام حد بند جنگلات میں قدرتی شجر کاری کے فروغ کے لئے نظر ثانی منصوبہ مالیتی 60کروڑ29لاکھ روپے ، محکمہ داخلہ کے زیر انتظام آزاد کشمیر میں ڈویژن کی سطح پرپولیس سیف سٹی کا 65کروڑ روپے کا نظر ثانی منصوبہ زیرغور آیا۔
محکمہ اطلاعات کے زیر انتظام سوشل و ڈیجیٹل میڈیاکی نگرانی کا منصوبہ مالیتی 12کروڑ 76لاکھ روپے،محکمہ شاہرات کے زیر انتظام ضلع نیلم ،باغ ،پونچھ، سدھنوتی اور میرپورمیں لنک/مین سڑکات کی تعمیر، بہترگی و مرمتی کے9 منصوبہ جات لاگتی 2ارب 27کروڑ روپے سے زائد کے منصوبہ جات زیر غور لائے گئے۔
مزید براںآزادجموں و کشمیرٹیوٹاکے زیر انتظام ضلع بھمبرمیں کالج آف ٹیکنالوجی کی عمارت کی تعمیر،محکمہ معدنیات کے زیر انتظام ضلع نیلم میں6جہتی قیمتی معدنیاتی پتھر کے ذخائر کی فزیبلٹی و کھوج اور انفارمیشن ٹیکنالوجی بورڈ کے زیر انتظام ریکارڈ اراضی کی کمپیوٹرائزیشن اورذیلی عدلیہ کی خود کاری کے منصوبہ جات کے دورانیہ میں اضافہ اور آزاد کشمیر میں منی سپورٹس گرائونڈزکی تعمیرکے منصوبہ جات کو بھی زیر غور لایا گیا۔
