راولپنڈی: فیلڈ مارشل سید عاصم منیر، چیئرمین جوائنٹ چیفس آف سٹاف کمیٹی، چیف آف ایئر سٹاف، چیف آف نیول سٹاف اور پاکستان کی مسلح افواج کی جانب سے کیپٹن کرنل شیر خان شہید، نشانِ حیدر کو ان کی 26ویں برسی پر دل کی گہرائیوں سے خراجِ عقیدت پیش کیاگیا ہے۔
آئی ایس پی آر کی جانب سے بیان میں کہا گیا ہے کہ 1999 کی کارگل جنگ کے دوران کیپٹن کرنل شیر خان شہید نے بے مثال جرأت اور وطن سے محبت کا مظاہرہ کرتے ہوئے مادرِ وطن کے دفاع میں اپنی جان کا نذرانہ پیش کیا۔
وہ پاکستان کی مسلح افواج اور پوری قوم کے لیے حوصلے اور عزم کی ایک روشن علامت ہیں۔
یہ بھی پڑھیں: لینڈ سلائیڈنگ میں پھنسے 80 سیاح پاک فوج اور سول اداروں کی بروقت کارروائی سے بحفاظت ریسکیو ہو گئے
آئی ایس پی آر کے مطابق نامساعد حالات میں ان کی شجاعت، قیادت اور فرض شناسی پاک فوج کی اعلیٰ روایات کی عکاس ہیں۔
انہوں نے فرنٹ لائن پر دشمن کا مقابلہ کرتے ہوئے غیر معمولی بہادری دکھائی اور وطن کے دفاع میں اپنی جان قربان کی۔
بیان میں کہا گیا ہے کہ کیپٹن کرنل شیر خان شہید کی عظیم قربانی، پاکستان کی مسلح افواج کی اس جذبۂ قربانی اور فرض شناسی کی آئینہ دار ہے جو ان کے کردار کا حصہ ہے۔
ان کی شجاعت اور حب الوطنی آج بھی قوم کے دلوں میں زندہ ہے اور آنے والی نسلوں کے لیے مشعلِ راہ ہے۔ ہم اپنے اس عظیم ہیرو کو سلام پیش کرتے ہیں اور اس عزم کا اعادہ کرتے ہیں کہ وطنِ عزیز کے دفاع کے لیے ہر قیمت چکائیں گے۔
اس دن کے موقع پر مسلح افواج، وفاداری، جرأت اور عزت و وقار جیسے اعلیٰ اقدار کو اپنانے کے عہد کی تجدید کرتی ہیں جن کا عملی مظاہرہ کیپٹن کرنل شیر خان شہید نے کیا۔
