سربراہ پاک فضائیہ ظہیر احمد بابر سدھو نے امریکا کا تاریخی دورہ کیا ہے جہاں ان کی پینٹاگون، محکمہ خارجہ اور کیپیٹل ہل میں اعلیٰ سطحی ملاقاتیں ہوئی ہیں۔
پاک فوج کے شعبۂ تعلقاتِ عامہ (آئی ایس پی آر) کے مطابق گزشتہ ایک دہائی سے زائد عرصے میں کسی پاکستانی ایئر چیف کا یہ امریکا کا پہلا دورہ ہے۔
امریکا میں ایئرچیف نے محکمہ خارجہ اور کیپیٹل ہل میں اعلیٰ سطح کی ملاقاتیں کیں، انہوں نے امریکی فضائیہ کی سیکرٹری بین الاقوامی امور اور چیف آف جنرل اسٹاف سے ملاقاتیں بھی کیں۔
یہ بھی پڑھیں: پی ایس ایل کے میچ میں پاک فضائیہ کو خراج تحسین، ایئرچیف کی بھی شرکت
ایئر چیف نے دورے کے دوران امریکی عسکری و سیاسی قیادت سے اعلیٰ سطح کی ملاقاتیں کی ہیں جن میں علاقائی اور عالمی سلامتی سے متعلق اہم امور پر تبادلۂ خیال کیا گیا۔
ایئر چیف نے پینٹاگون میں امریکی سیکرٹری آف دی ایئر فورس (انٹرنیشنل افیئرز) سے ملاقات کی، انہوں نے امریکی فضائیہ کے چیف آف اسٹاف سے بھی ملاقات کی۔
ملاقاتوں میں دو طرفہ عسکری تعاون کے فروغ پر تبادلہ خیال کیا گیا، مشترکہ تربیت و ٹیکنالوجی کے تبادلے کے امکانات پر بھی تفصیلی بات چیت ہوئی۔
ایئر چیف نے امریکا اور پاکستان کے درمیان تاریخی اور کثیر الجہتی تعلقات پر روشنی ڈالی۔دونوں فضائی افواج کے درمیان تربیت اور روابط کو مزید فروغ دینے کے عزم کا اعادہ بھی کیا گیا۔
