اسلام آباد ( مانیٹرنگ ڈیسک )پاک فوج کے ترجمان لیفٹیننٹ جنرل احمد شریف چوہدری نے کہا ہے کہ بھارت پاکستان کے خلاف افغانستان کا استعمال کرتا ہے، افغان بھائیوں کو اپنے ملک میں دہشت گردوں کو جگہ نہیں دینی چاہیے اور نہ ہی ہندوستان کا آلہ کار بننا چاہیے۔
خیبرپختونخوا کی جامعات کے 2500 سے زائد طلباء نے ڈی جی آئی ایس پی آر کے لیفٹیننٹ جنرل احمد شریف چوہدری کے ساتھ خصوصی نشست میں شرکت کی۔
ہر جگہ سبز ہلالی پرچموں کی بہار اور ملی نغموں نے ماحول کو حب الوطنی کے جذبات سے بھر دیا،پاکستان ہمیشہ زندہ باد کے نعرے سیشن کے دوران پشتون طلباء نے اپنے جوش و خروش کا اظہار کیا اور دشمن کو واضح پیغام بھیجا کہ جو لوگ پاکستان کو گندی نظروں سے دیکھتے ہیں انہیں سبق دیا جائے گا۔
ڈی جی آئی ایس پی آر لیفٹیننٹ جنرل احمد شریف چوہدری نے طلباء سے خطاب کرتے ہوئے کہا کہ بھارت کا خیال تھا کہ وہ حملہ کرے گا اور پاکستان جواب نہیں دے گا،آپ نے دیکھا کہ ہم سب اپنے ملک کے پیچھے کیسے کھڑے ہیں۔
یہ خبر بھی پڑھیں ۔ہماری شہادت کی آرزو زندگی سے زیادہ ہے چاہےوردی کسی بھی رنگ کی ہو، ترجمان پاک فوج
پورا پاکستان اپنےملک کے پیچھے کھڑا ہے، اللہ کے حکم سے یہ آہنی دیوار ہے ،انہوں نے کہا کہ کفر اور سچائی ایک ساتھ نہیں رہ سکتی۔
لوگوں کا خیال تھا کہ فوج اور عوام ایک دوسرے سے بہت دور ہیں،نہیں، قوم اور فوج ہمیشہ ساتھ رہتے تھے اور ہمیشہ ساتھ رہیں گے ،انہوں نے کہا کہ 6 اور 7 مئی کو جن ہوائی اڈوں سے ہندوستانی طیاروں نے اڑان بھری تھی وہ تباہ کردئیے گئے۔
کیا آپ کی فوج نے کسی شہری انفراسٹرکچر یا شہری آبادی کو نشانہ بنایا؟ نہیں، ہم امن پسند ہیں، ہم امن کو ترجیح دیتے ہیں، ہمارا پہلا انتخاب امن ہے۔
اگر ہندوستان دوبارہ اس بے وقوفی کا ارتکاب کرتا ہے تو ہمارا ردعمل اور بھی شدید ہوگا، اس خطے اور پاکستان میں ہونے والی تمام دہشت گردی کے پیچھے بھارت کا ہاتھ ہے۔
یہ خبر بھی پڑھیں ۔جنگ بندی کی خلاف ورزی ہوئی توجواب فوری اور موثر ہوگا،بھارت کا چھٹا گرنے والا طیارہ میراج تھا، ترجمان پاک فوج
بلوچستان میں ہر شہادت کے پیچھے ہندوستان کا ہاتھ ہے،لیفٹیننٹ جنرل احمد شریف چوہدری نے کہا کہ آپ کی فوجی قیادت نے فیصلہ کیا ہے کہ بھارت کو 26 مقامات پر جواب دیا جائے گا۔
ڈی جی آئی ایس پی آر نے مزید کہا کہ افغانستان ہمارا برادرانہ پڑوسی ہے، ایک اسلامی ملک ہے، پختون افغان آپ کا بھائی ہے، مسئلہ ان کی اشرافیہ کا ہے، بھارت پیسہ دیتا ہے اور افغانستان کی اشرافیہ کو خریدتا ہے۔
بھارت پاکستان کے خلاف افغانستان کا استعمال کرتا ہے، ہم افغان بھائیوں سے کہتے ہیں کہ اپنے ملک میں دہشت گردوں کو جگہ نہ دیں اور نہ ہی ہندوستان کے آلہ کار بنیں۔ تقریب میں ڈی جی آئی ایس پی آر لیفٹیننٹ جنرل احمد شریف چوہدری نے بھی “کشمیر بنے گا پاکستان” کا نعرہ بلند کیا۔
