اسلام آباد (آئی پی ایس) پاک فوج کے ترجمان لیفٹیننٹ جنرل احمد شریف چوہدری نے کہا ہے کہ “پاکستانی قوم نہ تو پہلے جھکی تھی اور نہ ہم اب جھکیں گے، میں پہلے بھی کہتا رہا ہوں اور اب بھی کہتا ہوں کہ ہماری شہادت کی آرزو زندگی سے زیادہ ہے۔”
ڈی جی آئی ایس پی آر نے بھارت سے کشیدگی اور پاک چین تعلقات پر چائنا میڈیا گروپ کو خصوصی انٹرویو دیتے ہوئے قومی سلامتی، علاقائی صورتحال، عالمی چیلنجز اور امن کی اہمیت پر کھل کر اظہار خیال کیا۔ ان کا کہنا تھا کہ”پاکستان کے لیے سب اہم چیز اس کا عزم اور اس کی طاقت ہے، ہم اللہ کے بعد سب سے زیادہ اپنے آپ پر انحصار کرتے ہیں۔ جب ہمارا عزم مضبوط ہوگا جو ہم نے دکھایا بھی تو پھر بین الاقوامی کمیونٹی بھی اپنا کردار ادا کرتی ہے۔”
انہوں نے عالمی صورتحال کا ذکر کرتے ہوئے کہا”دنیا کے جتنے بھی ممالک ہیں سب کو اس وقت بڑے چیلنجز کا سامنا ہے، جو بڑے ممالک ہیں ان کا ویژن بھی بڑا ہے، لوگ انسانیت کی ترقی کی جانب دیکھ رہے ہیں۔ اس دنیا کو موسمیاتی تبدیلی کے مسائل ہیں، بڑھتی آباد کے مسائل ہیں یعنی بہت سارے مسائل سے دنیا نبردآزما ہے۔”
بھارت کے رویے پر تنقید کرتے ہوئے ترجمان پاک فوج نے کہا”کیا ایسے میں ایک ملک دوسرے ملک پر بلاجواز، جھوٹے بیانیے اور بغیر ثبوت کے چڑھ دوڑے، پڑوسی ممالک کے اوپر اپنی اجارہ داری مسلط کرنے کی کوشش کرے۔”
انہوں نے ایک بار پھر دہرایا”پاکستان کی قوم تو نہ پہلے جھکی تھی اور نہ ہم اب جھکیں گے، میں پہلی بھی کہتا رہا ہوں اور اب بھی کہتا ہوں کہ ہماری شہادت کی آرزو زندگی سے زیادہ ہے۔ چاہے کسی نے نیلی، سفید یا خاکی وردی پہن رکھی ہے شہادت ہمارے لیے اعزاز ہے۔”
پاک چین تعلقات کے حوالے سے بات کرتے ہوئے انہوں نے کہا”پاکستان اور چین دنیا میں دو ذمہ دار ملک ہیں، پاکستان اور چین دونوں کی پہلی ترجیح لوگوں کی فلاح و بہبود ہے۔ لوگوں کی خوشحالی ہمیشہ امن و استحکام سے آتی ہے۔”
انہوں نے مزید کہا”پاکستان اور چین دونوں خطے میں امن و استحکام کے لیے کوشاں ہیں، اس کے لیے ہم دہشتگردی کی لعنت سے لڑ رہے ہیں اور دہشتگردی کا مقصد ہی ترقی کو روکنا ہے۔ چین نے انتہائی کم عرصے میں اتنی بڑی آبادی کے ساتھ جو ترقی کی ہے اسے دنیا کو دیکھنا چاہیے، پاکستان کے عوام بھی یہی چاہتے ہیں کہ ہم ترقی اور استحکام کی جانب جائیں۔”
یہ بھی پڑھیں: خادم حرمین شریفین شاہ سلمان کاایک ہزار فلسطینیوں کو ذاتی خرچ پرحج کرانے کا اعلان
ڈی جی آئی ایس پی آر نے کہا کہ آج پاکستان کی گلیوں میں لوگ فتح نہیں بلکہ امن کی خوشی مناتے نظر آتے ہیں، ہم عاجزی کرتے ہوئے اللہ کا شکر ادا کرتے ہیں، ہم اللہ تعالیٰ کے حضور سجدہ شکر ادا کرتے ہیں کیونکہ ہم امن پسند ہیں، آپ دیکھیں گے کہ انشاء اللہ پاکستان تیزی سے ترقی کرے گا۔
یہی جذبہ اور عزم پاکستان کو ترقی کی راہوں پر گامزن رکھے گا اور امن کے استحکام کا ضامن ثابت ہوگا۔
