اسلام آباد(کشمیر ڈیجیٹل)بھارت نے 29 اور 30 اپریل کی درمیانی شب لائن آف کنٹرول پر سیز فائر کی خلاف ورزی کرتے ہوئے فائرنگ کی جس کا سیاچن سے بحیرہ عرب تک دفاع وطن کیلئے تیار و مستعد پاک فوج کی جانب سے منہ توڑ جواب دے دیا گیا۔
سکیورٹی ذرائع کے مطابق بھارت کی جانب سے لائن آف کنٹرول کے کیل اور منڈر سکیٹر میں بلااشتعال فائرنگ کی گئی۔ذرائع نے بتایا کہ بھارت کی جانب سے بلااشتعال فائرنگ میں چھوٹے ہتھیاروں کا استعمال کیا گیا۔
ذرائع نے مزید بتایا کہ پاک فوج نے بھرپور جوابی کارروائی کرتے ہوئے بھارتی فوج کو منہ توڑ جواب دیا اور اس مؤثر جواب سے دشمن کو خاموش کروا دیا۔سکیورٹی ذرائع نے بتایا کہ پاکستان فوج کے مؤثر جواب سے دشمن کے متعدد مورچے تباہ ہوگئے۔
انہوں نے کہا کہ مقبوضہ کشمیر میں واقعہ لائن آف کنٹرول پر بھارتی چکپترا پوسٹ کو بھی تباہ کر دیا گیا۔واضح رہے کہ بھارت نے مقبوضہ کشمیر کے سرحدی علاقوں کو بھی خالی کروالیا ہے اور مسلمانوں کے خلاف کریک ڈاؤن کر رہا ہے۔
ذرائع کا کہنا ہے کہ بھارت کی طرف سے یہ اشتعال انگیزی اس کے جنگی جنون کی غماز ہے۔سکیورٹی ذرائع نے کہا کہ پاک فوج ملکی سالمیت کے دفاع کے لیے ہمہ وقت تیار ہے۔
وزیر خارجہ اسحاق ڈار اور ترجمان پاک فوج آج شام 7:10 بجے پریس کانفرنس کریں گے
