پاکستان میں رواں ہفتے شدید گرمی کی لہر کا سامنا ہو سکتا ہے، جس کے دوران درجہ حرارت 50 ڈگری سینٹی گریڈ تک پہنچنے کا امکان ہے۔
امریکی اخبار “واشنگٹن پوسٹ” کی رپورٹ کے مطابق جنوبی ایشیا رواں ہفتے گرمی کےایک نئے عالمی ریکارڈ کے قریب پہنچ سکتا ہے اور پاکستان کے وسطی و جنوبی علاقے اس کی لپیٹ میں آ سکتے ہیں۔
رپورٹ میں بتایا گیا ہے کہ پاکستان کے کئی علاقوں میں درجہ حرارت 50 ڈگری کو چھو سکتا ہے، جو 2018 میں نواب شاہ میں ریکارڈ کیے گئے درجہ حرارت کے برابر ہوگا، جب اپریل کے مہینے میں پارہ 50 ڈگری تک پہنچا تھا اور وہ ایشیا میں گرمی کا ایک تاریخی ریکارڈ بن گیا تھا۔
دوسری جانب محکمہ موسمیات پاکستان (پی ایم ڈی) نے ہیٹ ویو میں جزوی کمی کی نوید سناتے ہوئے یکم سے 4 مئی کے دوران ملک کے بالائی اور وسطی علاقوں میں آندھی، گرج چمک، بارش اور ژالہ باری کی پیشگوئی جاری کی ہے۔
محکمہ موسمیات کے مطابق 30 اپریل کی شام تک مغربی ہواؤں کا ایک نیا سلسلہ ملک کے بالائی علاقوں میں داخل ہو جائے گا، جبکہ یکم مئی سے شمال مشرقی پنجاب میں نمی کی ہوائیں داخل ہونے کا امکان ہے، جس کے نتیجے میں موسم میں تبدیلی آ سکتی ہے۔
اس موسمیاتی نظام کے باعث کشمیر ،اسلام آباد، راولپنڈی، مری، گلیات، گجرات، سیالکوٹ، نارووال، لاہور، چکوال، اٹک، جہلم، ساہیوال، قصور، فیصل آباد، ایبٹ آباد، سوات، شانگلہ، دیر، چترال، بونیر، مالاکنڈ، کوہاٹ، لکی مروت، وزیرستان، باجوڑ اور گلگت بلتستان میں مختلف مقامات پر گرج چمک کے ساتھ بارش اور ژالہ باری کا امکان ظاہر کیا گیا ہے۔
یہ بھی پڑھیں: لیبر ڈے پر بینکنگ سرگرمیاں معطل ، یکم مئی کو تمام بینک بند رہیں گے
ادھر جنوبی پنجاب، سندھ اور بلوچستان کے کچھ حصوں جیسے ملتان، ڈیرہ غازی خان، بہاولپور، بہاولنگر، سکھر، خیرپور، تھرپارکر، سانگھڑ، عمرکوٹ، ژوب، خضدار، موسیٰ خیل اور بارکھان میں بھی 2 سے 5 مئی کے دوران وقفے وقفے سے آندھی، گرج چمک اور بارش کی توقع ہے۔
پی ایم ڈی نے شہریوں کو خبردار کیا ہے کہ آندھی، ژالہ باری اور آسمانی بجلی جیسے واقعات بجلی کے کھمبوں، درختوں، گاڑیوں اور سولر پینلز سمیت دیگر کمزور ڈھانچوں کو نقصان پہنچا سکتے ہیں، لہٰذا احتیاطی تدابیر اختیار کی جائیں۔
