استحکامِ پاکستان پارٹی (آئی پی پی) کے صدر عبدالعلیم خان نے آزاد جموں و کشمیر کے عوام پر زور دیا ہے کہ وہ اپنے حقِ رائے دہی کا ذمہ داری کے ساتھ استعمال کریں، کیونکہ ووٹ ایک مقدس امانت ہے اور اپنے مستقبل کا فیصلہ صرف عوام ہی کر سکتے ہیں۔
اپنے ویڈیو پیغام میں عبدالعلیم خان نے بالخصوص آزاد کشمیر کے نوجوانوں سے اپیل کی کہ وہ آئندہ انتخابات میں قومی مفاد، شعور اور ذمہ داری کو مدنظر رکھتے ہوئے اپنے ووٹ کا استعمال کریں۔
یہ بھی پڑھیں:پروفیسر سردار آصف خان بھی استحکام پاکستان پارٹی میں شامل، عبدالعلیم خان کا شاندار خیر مقدم
انہوں نے کہا کہ آزاد کشمیر کی پائیدار ترقی اور معاشی استحکام کے لیے ضروری ہے کہ خطے کے اندر ہی آمدن کے مؤثر ذرائع پیدا کیے جائیں۔
ان کے مطابق جب تک آزاد کشمیر معاشی طور پر مضبوط نہیں ہوگا اور اپنی آمدن میں اضافہ نہیں کرے گا، اس وقت تک ترقیاتی منصوبوں اور عوامی فلاح و بہبود کے اقدامات کو مؤثر انداز میں آگے نہیں بڑھایا جا سکتا۔
عبدالعلیم خان نے کہا کہ آزاد کشمیر میں سرمایہ کاری کی اشد ضرورت ہے اور حکومت کو ایسا سازگار ماحول فراہم کرنا چاہیے جہاں سرمایہ کار بلاخوف و خطر سرمایہ کاری کر سکیں۔ ان کے بقول اس سے صنعت و تجارت کو فروغ ملے گا، معیشت مستحکم ہوگی اور ترقی کے نئے مواقع پیدا ہوں گے۔
انہوں نے کہا کہ سرمایہ کاری نہ صرف خطے کو معاشی طور پر مضبوط بنائے گی بلکہ بے روزگار نوجوانوں، خصوصاً نوجوان مرد و خواتین، کے لیے روزگار کے وسیع مواقع بھی پیدا کرے گی۔
آزاد کشمیر کی قدرتی خوبصورتی، دلکش وادیوں اور سیاحتی مقامات کا ذکر کرتے ہوئے آئی پی پی کے صدر نے کہا کہ سیاحت کے شعبے کی ترقی خطے کی معیشت کے لیے بنیاد ثابت ہو سکتی ہے۔
انہوں نے کہا کہ جدید تقاضوں کے مطابق سیاحتی انفراسٹرکچر کی بہتری، بنیادی سہولیات کی فراہمی اور اس شعبے میں سرمایہ کاری سے نہ صرف آمدن میں اضافہ ہوگا بلکہ کاروباری سرگرمیوں کو فروغ ملے گا اور ہزاروں نوجوانوں کو روزگار ملے گا۔
عبدالعلیم خان نے کہا کہ انتخابات ہر پانچ سال بعد عوام کو اپنے مستقبل کا فیصلہ کرنے کا موقع فراہم کرتے ہیں، اس لیے ووٹ دیتے وقت ذاتی تعلقات یا وقتی نعروں کے بجائے اپنے بچوں کے روشن مستقبل، اپنے علاقے کی ترقی، آزاد کشمیر کی خوشحالی اور آنے والی نسلوں کے بہتر مستقبل کو ترجیح دی جائے۔
یہ بھی پڑھیں:آزادکشمیر انتخابات، بڑی پیشرفت،استحکام پاکستان پارٹی، مسلم کانفرنس میں اتحاد
انہوں نے عوام کو خبردار کیا کہ وہ ان سیاستدانوں کے وعدوں پر اندھا اعتماد نہ کریں جو انتخابات سے قبل بڑے دعوے کرتے ہیں لیکن اقتدار میں آنے کے بعد انہیں پورا نہیں کرتے۔
ان کے مطابق امیدواروں کا انتخاب ان کی کارکردگی، دیانت داری، عوامی خدمت اور عملی اقدامات کی بنیاد پر ہونا چاہیے۔
نوجوانوں سے خطاب کرتے ہوئے عبدالعلیم خان نے کہا کہ وہ صرف اپنا ووٹ ڈالنے تک محدود نہ رہیں بلکہ اپنے والدین، بزرگوں اور خاندان کے دیگر افراد کو بھی پولنگ اسٹیشن لے جائیں اور انہیں اس بات کا شعور دیں کہ ووٹ ذاتی مفاد کے لیے نہیں بلکہ اپنے خاندان، علاقے اور آزاد کشمیر کے مستقبل کے لیے دیا جانا چاہیے۔
انہوں نے کہا کہ نوجوانوں کی ذمہ داری ہے کہ وہ اپنے اہلِ خانہ کی سیاسی رہنمائی کریں اور انہیں ایسے امیدواروں کے انتخاب کی ترغیب دیں جو دیانت داری، میرٹ، عوامی خدمت اور ترقی کا واضح وژن رکھتے ہوں۔
عبدالعلیم خان نے کہا کہ ووٹ ڈالنے سے پہلے ہر شہری کو اپنے علاقے کی محرومیوں، آزاد کشمیر کو درپیش مسائل، ماضی کی ناانصافیوں اور حکومتوں کے ادھورے وعدوں پر ضرور غور کرنا چاہیے۔
انہوں نے کہا کہ آزاد کشمیر کے عوام کے پاس اب ایک بہتر، ترقی یافتہ اور خوشحال مستقبل کے انتخاب کا بہترین موقع موجود ہے۔
یہ بھی پڑھیں:میرپور ڈویژن کے انتخابات ملتوی ہونے کا نوٹیفکیشن جعلی، ووٹرز افواہوں پر کان نہ دھریں، الیکشن کمیشن
آخر میں آئی پی پی کے صدر نے تمام کشمیری بہنوں اور بھائیوں سے اپیل کی کہ وہ جمہوری عمل میں بھرپور حصہ لیں اور اپنے حقِ رائے دہی کا استعمال کرتے ہوئے ایسا فیصلہ کریں جو آزاد کشمیر کو ترقی، خوشحالی اور معاشی استحکام کی نئی منزلوں تک پہنچائے۔
انہوں نے اس عزم کا اعادہ کیا کہ استحکامِ پاکستان پارٹی آزاد کشمیر میں عوامی خدمت، معاشی استحکام، شفاف طرزِ حکمرانی، نوجوانوں کے لیے روزگار، سرمایہ کاری کے فروغ اور خطے کی مجموعی ترقی کے لیے اپنی جدوجہد جاری رکھے گی۔
