آزاد جموں و کشمیر قانون ساز اسمبلی کے انتخابات 2026 کے سلسلے میں الیکشن کمیشن میں گوشوارے اور ریٹرننگ افسران کے پاس امیدواروں کی جانب سے کاغذات نامزدگی جمع کروانے کا سلسلہ تیزی سے جاری ہے۔ الیکشن کمیشن کے ترجمان کی طرف سے جاری کردہ معلومات کے مطابق اب تک مجموعی طور پر 45 انتخابی حلقوں سے 755 امیدواران کی جانب سے اپنے کاغذات نامزدگی جمع کروائے جا چکے ہیں۔
ترجمان الیکشن کمیشن کی جانب سے فراہم کردہ تفصیلات کے مطابق مہاجرین جموں و کشمیر مقیم پاکستان کے مختلف حلقوں سے کاغذات نامزدگی جمع کروانے والے امیدواران کی کل تعداد 146 ہو گئی ہے۔ اگر مختلف ڈویژنز کے لحاظ سے دیکھا جائے تو میرپور ڈویژن سے سب سے زیادہ یعنی 264 امیدواروں نے اپنے کاغذات جمع کرائے ہیں جبکہ مظفرآباد ڈویژن سے 193 امیدواران نے کاغذات نامزدگی جمع کرائے ہیں۔ اس کے علاوہ پونچھ ڈویژن میں کاغذات نامزدگی جمع کروانے والے امیدواروں کی تعداد 152 ریکارڈ کی گئی ہے۔ الیکشن کمیشن کے ترجمان نے واضح کیا ہے کہ امیدواروں کے لیے کاغذات نامزدگی جمع کروانے کے لیے 23 جون کی آخری تاریخ مقرر کی گئی ہے۔
یہ بھی پڑھیں: الیکشن کمیشن آزادکشمیر:امیدواروں،ایجنٹوں کیلئےضابطہ اخلاق جاری
سیاسی جماعتوں کے ٹکٹوں کا اجراء اور موجودہ صورتحال:
انتخابات کے اس اہم ترین مرحلے میں آزاد جموں و کشمیر کی مختلف سیاسی جماعتوں کی طرف سے امیدواروں کو ٹکٹ جاری کرنے کا عمل بھی سامنے آ رہا ہے۔ پاکستان مسلم لیگ (ن) نے اب تک آزاد جموں و کشمیر کے 37 انتخابی حلقوں سے اپنے امیدواروں کو باقاعدہ طور پر ٹکٹ جاری کر دیے ہیں تاہم ن لیگ کی جانب سے بھی 8 حلقوں سے تاحال امیدواران فائنل نہیں کیے جا سکے ہیں۔ دوسری جانب پاکستان پیپلز پارٹی، مسلم کانفرنس اور جمعیت اہلحدیث آزاد جموں وکشمیر سمیت دیگر اہم سیاسی جماعتوں کی طرف سے تاحال اپنے ٹکٹ جاری نہیں کیے جا سکے ہیں۔
سیاسی جماعتوں کی طرف سے ٹکٹوں کے مکمل اجراء نہ ہونے کے باوجود ریٹرننگ افسران کے دفاتر میں امیدواروں کا رش دیکھا جا رہا ہے اور مقررہ آخری تاریخ کے مطابق کاغذات جمع کرائے جا رہے ہیں۔ الیکشن کمیشن کی جانب سے تمام انتخابی حلقوں میں انتخابی ضابطہ اخلاق اور گوشواروں کی وصولی کے عمل کو مانیٹر کیا جا رہا ہے۔ تمام ڈویژنز اور مہاجرین کے حلقوں سے امیدواروں کی اتنی بڑی تعداد میں آمد کے بعد انتخابی سرگرمیوں میں واضح تیزی آ گئی ہے اور تمام ریٹرننگ افسران اپنے فرائض انجام دے رہے ہیں۔
