ہیوسٹن : فیفا ورلڈ کپ 2026 کے ایک اہم اور سنسنی خیز مقابلے میں نیدرلینڈز نے شاندار کارکردگی کا مظاہرہ کرتے ہوئے سویڈن کو ایک کے مقابلے میں 5 گول سے عبرتناک شکست دے دی ۔ اس بھاری مارجن سے کامیابی کے بعد ڈچ ٹیم گروپ ایف میں سرفہرست آ گئی ہے ۔
ہیوسٹن کے این آر جی اسٹیڈیم میں کھیلے گئے اس میچ میں نیدرلینڈز کے فارورڈز نے آغاز سے ہی جارحانہ کھیل پیش کیا اور سویڈن کا دفاعی لائن اپ ان کے پے در پے حملوں کو روکنے میں بری طرح ناکام نظر آیا ۔
میچ کا احوال: بروبی اور گاکپو کا جارحانہ کھیل
نیدرلینڈز نے میچ کے آغاز سے ہی حریف ٹیم پر دباؤ بڑھا دیا۔ کھیل کے محض 5ویں منٹ میں اسٹار اسٹرائیکر برائن بروبی نے شاندار گول کر کے اپنی ٹیم کو برتری دلائی۔ بروبی کی جارحیت یہیں ختم نہیں ہوئی اور انہوں نے 17ویں منٹ میں ایک اور گول داغ کر اسکور 0-2 کر دیا، جو ہاف ٹائم تک برقرار رہا ۔
دوسرے ہاف کے شروع ہوتے ہی کوڈی گاکپو نے سویڈن کی مشکلات میں مزید اضافہ کر دیا۔ انہوں نے یکے بعد دیگرے دو شاندار گول اسکور کر کے نیدرلینڈز کی برتری کو 0-4 کر دیا ۔
سویڈن کی ناکام کوشش اور سمرول کا آخری وار
سویڈن کی جانب سے 59ویں منٹ میں انتھونی ایلانگا نے واحد گول اسکور کر کے خسارے کو کم کرنے کی کوشش کی، تاہم وہ اپنی ٹیم کو میچ میں واپس لانے کے لیے ناکافی ثابت ہوئی۔ میچ کے اختتامی لمحات میں، 89ویں منٹ پر، کرائسینسیو سمرول نے گیند کو جال کی راہ دکھا کر نیدرلینڈز کی 1-5 سے فتح پر مہر لگا دی ۔
میچ میں برائن بروبی، کوڈی گاکپو اور ڈینزل ڈمفریز نے غیر معمولی کھیل کا مظاہرہ کیا، جبکہ دفاع میں کپتان ورجل فان ڈائیک اور مڈفیلڈ میں فرینکی ڈی یونگ نے ٹیم کو مضبوط استحکام فراہم کیا ۔
گروپ کی صورتحال اور تاریخی سنگ میل
جاپان کے خلاف اپنا پہلا میچ 2-2 سے ڈرا کھیلنے کے بعد نیدرلینڈز کے لیے یہ جیت انتہائی اہم تھی۔ اس بڑی فتح کے ساتھ ہی ڈچ ٹیم نے فیفا ورلڈ کپ کی تاریخ میں اپنے 100 گولز بھی مکمل کر لیے ہیں، جو اس کے لیے ایک بڑا سنگ میل ہے ۔
دوسری جانب، اپنے پہلے میچ میں تیونس کو 1-5 سے ہرانے والی سویڈن کی ٹیم اس بدترین شکست کے بعد اگلے مرحلے میں رسائی کے لیے شدید دباؤ کا شکار ہو گئی ہے ۔
