اسلام آباد (1 جون 2026): خانپور ڈیم میں دوست کو گہرے پانی سے بچانے کی کوشش کے دوران 2 نوجوان ڈوب کر جاں بحق، شیخوپورہ میں نہر سے 4 روز بعد لاش برآمد۔
خانپور ڈیم میں پکنک کے دوران ایک انتہائی افسوسناک اور دلخراش واقعہ پیش آیا ہے جہاں اپنے ڈوبتے ہوئے ساتھی کو بچانے کی کوشش میں 2 نوجوان اپنی جان کی بازی ہار گئے۔ ریسکیو ذرائع کے مطابق یہ واقعہ اس وقت پیش آیا جب 3 دوست ڈیم میں نہانے کے لیے پانی میں اترے۔ نہانے کے دوران ایک نوجوان اچانک گہرے پانی کی طرف چلا گیا اور ڈوبنے لگا، جسے تڑپتا دیکھ کر اس کے باقی 2 دوست بھی اسے بچانے کی خاطر بغیر سوچے سمجھے پانی میں کود پڑے۔ تاہم، پانی کے تیز بہاؤ اور ڈیم کی گہرائی کے باعث تینوں دوست خود کو سنبھال نہ سکے اور پانی میں ڈوب گئے۔
یہ بھی پڑھیں: وسطی باغ سے مسلم لیگ ن کے ٹکٹ پر الیکشن ہر صورت لڑونگا : بریگیڈیئر( ریٹائرڈ) محمد خان
واقعے کی اطلاع ملتے ہی ریسکیو کی امدادی ٹیمیں فوری طور پر جائے وقوعہ پر پہنچیں اور بڑے پیمانے پر سرچ آپریشن کا آغاز کیا۔ ریسکیو اہلکاروں نے انتھک کوششوں کے بعد 2 نوجوانوں کی لاشیں پانی سے نکال لیں، جبکہ ان کے تیسرے دوست کو شدید تشویشناک حالت میں زندہ نکالنے میں کامیابی حاصل ہوئی۔ ریسکیو ٹیم نے فوری طور پر مذکورہ نوجوان کو ابتدائی طبی امداد دیتے ہوئے انتہائی نازک حالت میں خانپور اسپتال منتقل کر دیا ہے جہاں ڈاکٹرز اس کی جان بچانے کی کوشش کر رہے ہیں۔
دوسری جانب، ڈوبنے کا ایک اور افسوسناک واقعہ شیخوپورہ میں پیش آیا جہاں نہر اپر چناب میں نہاتے ہوئے ڈوبنے والے نوجوان کی لاش 4 روز بعد تلاش کر لی گئی ہے۔ ریسکیو حکام کے مطابق 18 سالہ نوجوان تصور علی چار روز قبل نہر میں نہاتے ہوئے تیز لہروں کی نذر ہو گیا تھا، جس کی لاش کو طویل تلاش کے بعد اب نہر سے نکال کر ضروری قانونی کارروائی کے لیے منتقل کر دیا گیا ہے۔
