ڈسٹرکٹ مجسٹریٹ مظفرآباد کی جانب سے آزاد جموں و کشمیر قانون ساز اسمبلی کے انتخابات 2026 کے حوالے سے ایک اہم اعلامیہ جاری کیا گیا ہے۔ اس اعلامیے کے ذریعے عوام الناس کو مطلع کیا گیا ہے کہ انتخابی فہرستوں میں کوائف کی تصحیح اور اعتراضات سے متعلق درخواستیں جمع کروانے کا عمل جاری ہے۔
اعلامیے کے مطابق ووٹر لسٹوں پر اعتراضات داخل کرنے یا ان میں کسی بھی قسم کی درستگی کے لیے آخری تاریخ 4 مئی 2026 مقرر کی گئی ہے۔ اس مقصد کے لیے دفتر ریوائزنگ اتھارٹی و ڈپٹی کمشنر مظفرآباد میں باقاعدہ عملہ تعینات کر دیا گیا ہے، جو مقررہ دفتری اوقات میں شہریوں کی رہنمائی اور درخواستوں کی وصولی کے لیے ہمہ وقت موجود رہے گا۔
یہ بھی پڑھیں: جولائی کے دوسرے ہفتے میں الیکشن ہونگے نہیں تو سارے جائیں گے، فاروق حیدر
ڈسٹرکٹ مجسٹریٹ مظفرآباد نے عوام سے پرزور اپیل کی ہے کہ وہ انتخابی فہرستوں میں اپنے کوائف کی درستگی کو ہر صورت یقینی بنائیں۔ انہوں نے واضح کیا کہ اگر کسی شہری کو اپنے کوائف میں غلطی، نام کے اندراج یا فہرست سے اخراج سے متعلق کوئی بھی اعتراض ہو تو وہ مقررہ تاریخ ختم ہونے سے قبل اپنی درخواست لازمی جمع کروائیں۔
حکام کا کہنا ہے کہ اس عمل کا مقصد انتخابی فہرستوں کو ہر قسم کی غلطیوں سے پاک کرنا ہے تاکہ آنے والے انتخابات کے دوران ایک شفاف اور منصفانہ انتخابی عمل کو یقینی بنایا جا سکے۔ مقررہ تاریخ کے بعد موصول ہونے والی کسی بھی درخواست پر غور نہیں کیا جائے گا۔
